बोधदेहेन हृदयं शिलानाम् अप्य् अभेदिना । प्रविश्याशु विनिर्याति याति पातालम् अम्बरम्
तस्मान् मया पुरा राम बोधदेहेन तत् तदा । तथा कृतम् अनन्तेन चिन्मयव्योमरूपिणा
वज्रपाषाणपातालनभोऽन्तरगमागमान् । कुर्वतस् तादृशस्याशु न विघ्न उपजायते
बोधमात्रशरीरेण यावद् आस्ते जडेष्व् असौ । पदार्थेषु तथाभूतस् तावत् तत्रावतिष्ठते
स्वेच्छयैव चलित्वाथ ततो ऽन्यत्र प्रयाति चेत् । तत् तत्रैव स्थितिं याति तथैवाङ्ग मतिर् यथा
बोधमात्रं विदुर् देहम् आतिवाहिकम् अव्ययम् । इदानीं त्वं तम् एवेह बुद्धो ऽनुभवसि स्वयम्
चिन्मात्रव्योमरूपो ऽस्मीत्य् अर्कादाव् इति बोधतः । आत्मैवास्तम् उपानीतस् सन्न् एवासन्न् इवात्मना
स्थितं स्वप्नादिजगति तमसेवासतेव वा । आवृतेनेव वान्यासाम् अलभ्येन सता दृशाम्
तरङ्गलेखयाङ्गारसरितस् स्वाङ्गलग्नया । मनोराज्यश्रियेवाशु प्रोत्पन्नस्तब्धदेहया
कज्जलालिकया वह्निविपिने पुष्पशोभया । फुल्लत्स्थलाम्बुजासारकिंशुकाशोकरूपया
विततारम्भयाप्य् उच्चैर् ज्वालाजालतयेद्धया । उत्थायोत्थाय वलितं खललक्ष्म्येव लोलया
तेजस्तयापि परमाणुकणोदरे ऽपि दृष्टेत्थम् एवम् इह राम मया जगच्छ्रीः । अन्या च सा न च चिदम्बरतḫ परस्मात् स्वप्ने पुराचलगणो ऽत्र निदर्शनं वः
अथ वातमयीं धत्त्वा जगत्प्रेक्षणकौतुकात् । धारणां धीरया वृत्त्या वातताम् अहम् आगतः
सम्पन्नो ऽस्म्य् अनिलो वल्लीललनालोकलासकः । कमलोत्पलकुन्दादिजालकामोदपालकः
शीकरोत्करनीहारहेलाहरणतर्षुलः । सुरतश्रान्तसर्वाङ्गसमाह्लादनहर्षुलः
तृणगुल्मलतावल्लीदलताण्डवपण्डितः । लतौषधिफलोल्लासकुसुमामोदमण्डितः
मृदुर् मङ्गलकालेषु ललनालकचालकः । भीम उत्पातवातेषु पर्णवत्प्रौढपर्वतः
नन्दने कुन्दमन्दारमकरन्दरजोऽरुणः । नरके ऽङ्गारसम्भारो भुवि नीहारभासुरः
सागरे ऽसरलावर्तलेखानुमितसर्पणः । दिवि वारिदसञ्चारमृष्टामृष्टेन्दुदर्पणः
नक्षत्रक्षत्रसैन्यस्य रथो रंहोविबृंहितः । त्रैलोक्यसिद्धसञ्चारविमानधरणेहितः
सहोदर इव क्षिप्रगामित्वाद् अस्य चेतसः । अनङ्गो ऽपि समस्ताङ्गस् स्पन्दनानन्दचन्दनः
तुषारशीकरासारजरारोमविजर्जरः । आमोदयौवनोन्मादो मौनमार्दवशैशवः
नन्दनामोदमधुरो मधुरोदारसंसृतिः । चारुचैत्ररथोन्मुक्तो हृतकान्तारतश्रमः
चिरं गङ्गातरङ्गाङ्गदोलान्दोलनसश्रमः । श्रमस्वरूपज्ञतया निवारितरतश्रमः
पुष्पभारनतास् स्पर्शैर् वसन्तवनितालताः । चिरं चपलयंल् लोलदलहस्तालिलोचनाः
चिरं भुङ्क्त्वेन्दुबिम्बाङ्गं सुप्त्वा पूर्णाभ्रतल्पके । विधूय कमलानीकम् अपनीतरतश्रमः
समस्तरजसाम् ओको व्योमगामी तुरङ्गमः । आमोदमदमातङ्गसमुल्लासमहासुहृत्
धारोर्णाढ्यतडिच्छृङ्गपयोदपशुपालकः । तन्तुश् शीकरमुक्तानाम् अरिर् घर्मरजोरुजाम्
आकाशकुसुमामोदस् सर्वशब्दसहोदरः । नाडीप्रणालीसलिलं भूताङ्गोपाङ्गनर्तकः
मर्मकर्मकरैकात्मा हृद्गुहागेहकेसरी । नित्यम् एकान्तपथिकस् सारथिर् जातवेदसः