बीजे ऽन्तस् स्थावरे ह्य् आस्ते पदार्थो यत्र जङ्गमः । किं नास्ते तत्र देहे ऽन्तर् निजे चित्कल्पनात्मकः
साकारो गगनात्मास्तु निराकारं खम् अस्तु वा । आस्ते बहिर् अथान्तश् च भिन्ने बाह्यान्तरे न हि
आत्मारामẖ काष्ठमौनी नजडो ऽपि दृषज्जडः । अहं त्वम् इत्यादिमयो विराड् आत्मनि तिष्ठति
आवेष्टितोज्झितलतातृणदारुपुंवद् उच्छब्दम् अम्बुरयवच् च विचोपिताङ्गः । नानाविधे हि विहरन्न् अपि कार्यजाले तज्ज्ञश् शिलाजठरशान्तमनस्क एव
अथाग्रस्थब्रह्मलोके ब्रह्मणि ध्यानशालिनि । निक्षिप्ताक्षश् शनैर् दिक्षु दृष्टवान् अमलं ह्य् अहम्
द्वितीयम् अर्कं मध्याह्ने पश्चाद् अभ्युदितं स्फुटम् । दिग्दाहम् इव दिग्वक्त्रे वनदाहम् इवाचले
वह्निलोकम् इव व्योम्नि वडवाग्निम् इवार्णवे । ततो ऽपश्यम् अहं दीप्तं सूर्यं नैरृतदिङ्मुखे
सूर्यं याम्यैकदिग्भागे सूर्यम् अग्निकदिङ्मुखे । सूर्यम् ऐन्द्रैकदिग्भागे सूर्यम् ईशानदिङ्मुखे
सूर्यं कुबेरककुभि सूर्यं वायव्यदिक्तटे । सूर्यं वारुणदिग्भागे तेन विस्मितवान् अहम्
यावद् विचारयाम्य् आशु विधिवैधुर्यम् आकुलः । उदभूद् भूतलात् तावद् अर्क और्व इवार्णवात्
एकादर्शे ऽखिलार्काणां प्रतिबिम्बम् इवोत्थितम् । उदभूत् त्रयम् अर्काणाम् अम्बरे दिग्गणाम्बरे
तद् द्वादशपरीमाणं दीप्तं वृन्दं विवस्वताम् । सर्वदिक्कं ददाहोच्चैश् शुष्कं वनम् इवानलः
अथोदभूज् जगत्षण्डशोषणग्रीष्मवासरः । अनग्निर् अग्निदाहो द्राग् अदृश्योल्मुकगुल्मकः
अनग्निनाग्निदाहेन तेन तामरसेक्षण । अङ्गानि दावदग्धानि स्विन्नानीव ममाभवन्
प्रदेशं तम् अथ त्यक्त्वा दूरम् आरूढवान् अहम् । दृढहस्ततलाघातहतकन्दुकवन् नभः
अपश्यं गगनस्थो ऽहम् उदितं चण्डतेजसम् । तपन्तं द्वादशादित्यगणं दिक्षु दशस्व् अपि
बृहद्भडभडारावज्वलद्घनवनाचलम् । महाकहकहाशब्दक्वथत्सप्ताब्धिडम्बरम्
सज्वालोल्मुकनीरन्ध्रलोकान्तरपुरान्तरम् । ज्वालाघनघटाटोपसिन्दूरीकृतपर्वतम्
डीयमानमहाङ्गारस्थिरविद्युत्ककुप्तटम् । स्फुरत्कटकटाटोपचटत्पत्तनमण्डलम्
विदलद्भूतलोद्भूतधूमदण्डैश् शिलाघनैः । काचस्तम्भसहस्राढ्यभुवनास्थानमण्डपम्
क्वथद्भूतमहाभूतताराक्रन्दातिघर्घरम् । लोकपालपुरापातस्फुटच्चटचटोद्भटम्
ताराविशरणोद्गारवृष्टरत्नधरातलम् । सर्वस्थलालयचलद्दह्यमानजनव्रजम्
सर्वदिक्कानलप्लोषगणदुर्दर्शदिक्तटम् । उत्तप्ताम्बुभरस्विन्नजलेचरमहार्णवम्
धराधरदरीरन्ध्रभ्रमत्कुण्डलिमण्डलम् । पतत्पर्वतनिष्पिष्टप्लुष्टपत्तनमण्डलम्
पतत्पचपचाशब्दशब्दिताब्ध्यद्रिकुञ्जकम् । तपत्तापोन्नमद्भूतज्वरितार्णवपर्वतम्
हृदयस्फोटनिस्सारपतद्विद्याधराङ्गनम् । आक्रन्दरोदनश्रान्तद्रवन्निश्शरणामरम्
नागलोकज्वलज्ज्वालापातालोत्तप्तभूतलम् । शुष्कार्णवस्खदापङ्कविवृत्तोग्रजलेचरम्
और्वेणाबिन्धनाभावात् प्रोड्डीयेव सहस्रधा । गतेन शतधोत्थाय गृहीतगगनाङ्गनम्
अथोदभूज् ज्वलज्ज्वालाकिंशुकांशुकशोभितः । ताण्डवायेव कल्पाग्निस् तरलोल्मुकमाल्यवान्
तारं पटपटाटोपी रटद्भट इवोद्भटः । ज्वालोद्भुजो धूम्रकचो जगज्जीर्णकुटीनटः