त्रिपृथ्व्यादीनि चान्यानि द्विपृथ्व्यादीन्य् अथापि च । तथा सप्तमहाभूतान्य् एकजातिमयानि च
त्वादृशानुभवाभोगविरुद्धानीदृशानि तु । तथा नित्यान्धकाराणि सूर्यादिरहितानि च
तथा मीलितसर्गाणि एकनाथावृतानि च । विलक्षणप्रजेशानि विचित्राचारवन्ति च
जात्यन्धपारम्पर्येण सङ्केताचारवन्ति च । तथा नित्यप्रकाशानि ज्वलिताग्निमयानि च
तथा जलैकपूर्णानि पवनैकात्मकानि च । स्तब्धानि परमाकाशे वहन्ति च तथानिशम्
जायमानानि पुष्यन्ति परिपुष्टानि चाभितः । तिर्यग् गच्छन्ति चान्यानि मूकसर्गमयान्य् अपि
देवमात्रैकसर्गाणि नरमात्रमयानि च । दैत्यवृन्दमयान्य् एव क्रिमिनिर्विवराणि च
अन्तर् अन्तस् तदन्तश् च स्वकोशेष्व् अणुकं प्रति । जातानि जायमानानि कदलीदलपीठवत्
परस्परम् अदृष्टानि नानुभूतानि वै मिथः । सैनिकस्वप्नजालानि जातानीव महान्त्य् अपि
विविधान्य् अप्य् अनन्तानि स्वच्छाकाशात्मकान्य् अलम् । अन्योऽन्यम् अन्यवृत्तीनि न मिथो ऽन्यस्थितीनि च
मिथश् चान्यान्यशास्त्राणि मिथो ऽनन्तानि यानि च । अन्यान्यसन्निवेशानि मिथो ऽन्यान्यानि यानि च
अन्योऽन्यं परलोकानि मिथस् सिद्धपुराणि च । अन्यादृशमहाभूतान्य् अन्यादृक्षगिरीणि च
त्वादृशानुभवेहानाम् अगम्यान्य् आततानि च । असमञ्जसरूपाणि कथ्यमानानि मादृशैः
अणुवत् प्रोह्यमानानि चिदादित्यांशुमण्डले । परमार्थश्रियो व्योम्नि रश्मिजालानि कुण्डले
कानिचित् तानि तान्य् एव भूत्वा भूत्वा भवन्त्य् अलम् । कानिचित् तादृशान्य् एव जातानि वनपर्णवत्
अन्यान्य् अत्रार्धसदृशान्य् अन्यानि सदृशान्य् अपि । कञ्चित् कालं सुसदृशान्य् अन्यान्य् अनघ कानिचित्
अन्यान्य् अज्ञातकालानि यदृच्छावशतस् स्वयम् । जायमानानि पुष्यन्ति सुस्थिराणि स्थितानि च
फलानि तान्य् अनन्तानि परमार्थमहातरोः । अनन्यान्य् एव चान्यानि तन्मयान्य् एव वै ततः
कानिचित् स्वल्पकल्पानि दीर्घकल्पानि कानिचित् । अन्यान्य् अनियतं भूरि नियतं भूरि कानिचित्
तानि शून्यत्वजालानि परमाकाशकोशके । अपरिज्ञातकालानि दृढान्य् अज्ञातदोषके
अब्ध्यर्काकाशमेर्वादिशतैर् आवलितान्य् अलम् । चिच्चमत्कारखे स्वप्नजालान्य् आभान्ति चाबिलम्
अनुभूतेर् भ्रमात्मत्वात् कारणानाम् अभावतः । पृथ्व्यादीनाम् अहेतूनाम् अत्यन्तं सन्त्य् असन्ति च
मृगतृष्णाम्बुभरवद् द्विचन्द्रव्योमवर्णवत् । सम्पन्नानि न सत्यानि सत्यान्य् अप्य् अनुभूतितः
चित्सङ्कल्पनभस्य् एव भासमानानि भूरिशः । वासनावातनुन्नानि विनुन्नान्य् आत्मचेष्टितैः
सुरासुरादिमषकान्य् आकाशोडुम्बरद्रुमे । फलानि रसपूर्णानि घूर्णमानानि मारुतैः
अभिजातस्वभावस्य सर्वारम्भकरस्य च । शुद्धचित्तत्त्वबालस्य सङ्कल्पनगराणि खे
त्वम् अहं स इदं चेति धियाचलदृढान्य् अलम् । सम्पन्नान्य् अर्कदीप्त्येव पङ्कक्रीडनकानि च
धृतानि रसशालिन्या नियत्या नित्यतृप्तया । वनान्य् उग्रफलानीव वसन्तरसलेखया
महाकर्तॄण्य् अकर्तॄणि न कृतान्य् एव खानि च । स्वयंसम्पन्नरूपाणि चिद्व्योम्नैव कृतानि च
परमार्थमयान्य् एव तदन्यत्वोदितानि च । अलब्धान्य् एव लब्धानि सदासन्त्य् एव सन्ति च