अत्यन्तमूढया यत्र सुषुप्तसमया स्थितम् । चित्तशक्त्या गतं तत्र तरुगुल्मतृणादिताम्
क्षीणदेहसहस्रस्य चिरमूढस्य चेतसः । शिलाद्य् अवयवं विद्धि कस्यचित् पर्वतस्य वा
यथामोदेन कुसुमं माधुर्येण गुडो यथा । व्याप्तं सपर्वताकाशं चित्तत्त्वेन जगत् तथा
किञ्चित् क्षुब्धं पयẖ किञ्चित् सोम्यरूपं यथाम्बुधेः । किञ्चिद् अस्पन्दि किञ्चिच् च स्पन्दिरूपं तथा चितः
यदैवैवं चितो रूपं ततं बुद्धम् अखण्डितम् । तदैव तीर्णस् संसारḫ परमेश्वरतां गतैः
ब्रह्मेन्द्रविष्णुवरुणा यद् यत् कर्तुं समुद्यताः । तद् अहं चिद्वपुस् सर्वं करोमीत्य् एव भावयेत्
येषु येषु यथा यद् यद् दर्शनेषु निगद्यते । सर्वम् एवाङ्ग तत् सत्यं सर्वम् एव हि सर्वगम्
यं यं देशं विदेशं वा कालं वा कलनां च वा । वेत्सि ब्रह्मैव तत् सर्वं यथेच्छसि तथा कुरु
यद् यद् विभाव्यते रूपं तत्ताम् एति चिदीश्वरः । तां ताम् इच्छां पूरयितुं चिन्तामणिवद् आततः
यद् यद् विभाव्यते किञ्चित् तत् तत् तेन विवस्वता । क्रियते भूष्यते सम्यग् योज्यते चानुभूयते
चिन्मात्रत्वं प्रयातस्य तीर्णमृत्योस् स्वचेतसः । यो भवेत् परमानन्दẖ केनासाव् उपमीयते
सीमान्तस् सर्वदुẖखानां मृत्युर् एव जगत्त्रये । तं जित्वा यḫ परानन्दस् स वक्तुं केन पार्यते
सर्वासाम् एव दृष्टीनां सर्वासाम् एव सम्पदाम् । परिज्ञाय स्वम् आत्मानम् उपरि स्थीयते चिरम्
अप्य् अनन्ता महान्तो ऽपि वज्रभेदकरा अपि । शुद्धं खम् इव बाधन्ते तज्ज्ञं दोषा न केचन
जरामरणजन्माद्यास् समस्ता दोषदृष्टयः । आत्मज्ञानैकपर्यन्ता यथाब्ध्यन्तास् सरिद्रयाः
तावत् प्रकृतिर् आलोला यतते दुẖखसङ्क्षये । यावत् पश्यति नात्मानं तम् आलोक्योपशाम्यति
यथा पुष्पं समासाद्य नश्यन्ति शरवेणवः । तथात्मत्वं समासाद्य मनोबुद्धीन्द्रियादयः
सर्वम् आदौ जगच् छून्यं शून्यम् अन्ते च भूपते । अतश् शून्यात्मकं ह्य् एतद् विद्धि मध्ये ऽपि शून्यकम्
नान्तश् शूनं च शून्यं च नाचिद्रूपं न चिन्मयम् । नात्मरूपं नान्यरूपं भुवनं भावयन् भव
एतत् स्वरूपम् आसाद्य प्रकृतिḫ परिशाम्यति । स्वभावाच् चलितं वस्तु क्षोभं कृत्वा क्व तिष्ठतु
अज्ञानग्रन्थिनिर्भेदो मोक्ष इत्य् उच्यते ऽनघ । न देशो मोक्षनामास्ति न कालो नेतरा स्थितिः
अहङ्कृतेर् विमोहस्य क्षयेणेयं विलीयते । प्रकृतिर् भावनानाम्नी मोक्षस् स्याद् एष एव सः
एष एव शनैर् देहं गालयित्वोपशाम्यति । विवेको विषये वाचां भवत्य् अभवनिं गतः
यथाभूतम् इदं ज्ञात्वा जागतं वस्तुविभ्रमम् । भावयित्वा यथाज्ञानं ज्ञस् तिष्ठति यथासुखम्
प्रशान्तशास्त्रार्थविचारचापलो निवृत्तनानारसकाव्यकौतुकः । निरस्तनिश्शेषविकल्पविप्लवस् समस् सुखं तिष्ठसि शाश्वतात्मकः
आत्मारामो वीतशोको नित्यम् अन्तर्मुखस् सुखी । कुर्वन्न् अपि च कर्माणि तिष्ठत्य् अपगतभ्रमम्
अन्तश्शीतलया नित्यम् अनाकुलतया तथा । सोम्यरूपतया पूर्णश् शशाङ्क इव शोभते
समश् शान्तमना मौनी क्षीणवादविचारणः । कचत्य् आत्मनि चित्तत्त्वे दग्धेन्धन इवानलः
येन केनचिद् आच्छन्नो येन केनचिद् आशितः । यत्र क्वचन शायी च सम्राड् इव विराजते
वर्णधर्माश्रमाचारशास्त्रमन्त्रामयोज्झितः । निर्गच्छति जगज्जालात् पञ्जराद् इव केसरी