मयि याते ततो दीर्घे गगनाध्वन्य् अदृश्यताम् । निवृत्तो ऽसौ विहङ्गेशो दुस्त्यजा सङ्गतिस् सताम्
अन्योऽन्यं मयि तस्मिंश् च तरङ्गक इवाम्बुधौ । व्योमन्य् अदृश्यतां याते गतस् स्मृत्या मुनीन् अहम्
सप्तर्षिमण्डलं प्राप्य जायया परिपूजितः । विस्मयोत्फुल्लहृदयस् ततो ऽहं राघवावसम्
भुसुण्डो भव्यतुण्डो ऽसौ तस्मिन् कल्पलतालये । समश् शान्तमना मान्यस् स्वसमाधानवान् अभूत्
जीवत्य् अद्यापि मतिमांस् तस्मिन्न् एव लतादले । तत्रैव संस्थितो मेरोस् तथैव कनकद्रुमे
याते कृतयुगस्यादौ पुरा वर्षशतद्वये । सङ्गतो ऽहं भुसुण्डेन मेरौ शृङ्गद्रुमे ऽभवम्
अद्य राम कृते क्षीणे त्रेता सम्परिवर्तते । मध्ये त्रेतायुगस्यास्य जातस् त्वं रिपुसूदन
पुनर् अद्याष्टमं वर्षं तत्रैवोपरि भूभृतः । मिलितो ऽभूद् भुसुण्डो ऽसौ तथैवाजररूपवान्
इतीदं कथितं चित्रं भुसुण्डोदन्तम् उत्तमम् । श्रुत्वा विचार्य चैवान्तर् यद् युक्तं तत् समाचर
इति सुमुनिभुसुण्डसङ्कथां यो विमलमतिः प्रविचारयिष्यतीह । भवभयबहलां कुसंसृतिं स प्रसभम् असत्सरितं तरिष्यतीति
एवं भुसुण्डवृत्तान्तः कथितस् ते मयानघ । अनया प्रज्ञया तीर्णो भुसुण्डो मोहसङ्कटात्
एतां दृष्टिम् अवष्टभ्य स्वप्राणाभ्यासपूर्विकाम् । भुसुण्डवन् महाबाहो भव तीर्णभवार्णवः
यथा ज्ञानेन योगेन सन्तताभ्यासजन्मना । भुसुण्डो ऽवाप्तवान् प्राप्यं तथा साधय तत् पदम्
असक्तबुद्धयस् सन्तो भुसुण्डवद् अवस्थितिम् । प्राप्नुवन्ति परे तत्त्वे प्राणापानावलोकिनः
एता विचित्रा भवता श्रुता विज्ञानदृष्टयः । इदानीं धियम् आलम्ब्य यथेच्छसि तथा कुरु
भगवन् भवता भूमिभास्वता ज्ञानरश्मिभिः । हार्दम् उद्दामदौरात्म्यं प्रमृष्टम् अखिलं तमः
प्रबुद्धास् स्मः प्रहृष्टास् स्मः प्रविष्टास् स्मस् स्वम् आस्पदम् । स्थितास् स्मो ज्ञातविज्ञेया भवन्तो ह्य् अपरा इव
अहो भुसुण्डचरितं परं विस्मयकारकम् । भगवन् भवता प्रोक्तम् उत्तमार्थावबोधदम्
भुसुण्डचरिते ब्रह्मन्न् एतस्मिन् यत् त्वया विभो । तच् छरीरगृहं प्रोक्तं मांसचर्मास्थिनिर्मितम्
तत् केन नाम रचितं कुतो वा तत् समुत्थितम् । कथं वा स्थितिम् आयातं को वा तत्रावतिष्ठते
परमार्थावबोधाय दोषापाकरणाय च । शृणु राघव तत्त्वेन वक्ष्यमाणम् इदं मया
अस्थिस्थूणं नवद्वारं रक्तमांसावलेपनम् । शरीरसदनं राम न केनचिद् इदं कृतम्
आभासमात्रम् एवेदम् इत्थम् एवावभासते । द्विचन्द्रविभ्रमाकारं सद् असच् च व्यवस्थितम्
द्विचन्द्रविभ्रमविधौ द्विचन्द्रत्वं सद् एव हि । वस्तुतश् चैक एवेन्दुस् स्थितिर् देहे तथैव हि
देहप्रत्ययकाले हि देहो ऽयं सन् व्यवस्थितः । असन्न् एव वस्तुतस् स प्रोक्तस् सदसदात्मकः
स्वप्नस् स्वप्नविधौ सत्यस् त्व् अन्यदा स मुधैव हि । बुद्बुदो बुद्बुदविधौ सत्यो मिथ्यैव चान्यदा
देहो देहावधौ सत्यो ऽप्य् असत्य इतरावधौ । प्रतिभासावधौ तापे जलं सद् असद् अन्यदा
प्रतिभासावधौ देहस् सन्न् असंस् त्व् अन्यदा स्मृतः । आभासमात्रम् एवेदम् इत्थं सम्प्रति भासते
अयं नामाहम् इत्य् अन्तर् गृहीतमननं स्थितम्
मांसास्थिमयनिर्माणं देहो नान्यद् इति भ्रमम् । त्यज सङ्कल्पनिर्माणा देहास् सन्ति सहस्रशः