सामवेदः

अ तव श्रियो वर्ष्यस्येव विद्युतोग्नेश्चिकित्र उषसामिवेतयः च् यदोषधीरभिसृष्टो वनानि च परि स्वयं चिनुषे अन्नमासनि

अ वातोपजूत इषितो वशां अनु तृषु यदन्ना वेविषद्वितिष्ठसे च् आ ते यतन्ते रथ्यो यथा पृथक्शर्धांस्यग्ने अजरस्य धक्षतः

अ मेधाकारं विदथस्य प्रसाधनमग्निं होतारं परिभूतरं मतिम् च् त्वामर्भस्य हविषः समानमित्तवां महो वृणते नान्यं त्वत्

अ पुरूरुणा चिद्ध्यस्त्यवो नूनं वां वरुण च् मित्र वंसि वां सुमतिम्

अ ता वां सम्यगद्रुह्वाणेषमश्याम धाम च च् वयं वां मित्रा स्याम

अ पातं नो मित्रा पायुभिरुत त्रायेथां सुत्रात्रा च् साह्याम दस्यूं तनूभिः

अ उत्तिष्ठन्नोजसा सह पीत्वा शिप्रे अवेपयः च् सोममिन्द्र चमूसुतम्

अ अनु त्वा रोदसी उभे च् इन्द्र यद्दस्युहाभवः

अ वाचमष्टापदीमहं नवस्रक्तिमृतावृधम् च् इन्द्रात्परितन्वं ममे

अ इन्द्राग्नी युवामिमे ऽभि स्तोमा अनूषत च् पिबतं शम्भुवा सुतम्

अ या वां सन्ति पुरुस्पृहो नियुतो दाशुषे नरा च् इन्द्राग्नी ताभिरा गतम्

अ ताभिरा गच्छतं नरोपेदं सवनं सुतम् च् इन्द्राग्नी सोमपीतये

अ अर्षा सोम द्युमत्तमो ऽभि द्रोणानि रोरुवत् च् सीदन्योनौ योनेष्वा

अ अप्सा इन्द्राय वायवे वरुणाय मरुद्भ्यः च् सोमा अर्षन्तु विष्णवे

अ इषं तोकाय नो दधदस्मभ्यं सोम विश्वतः च् आ पवस्व सहस्रिणम्

अ सोम उ ष्वाणः सोतृभिरधि ष्णुभिरवीनाम् च् अश्वयेव हरिता याति धारया मन्द्रया याति धारया

अ अनूपे गोमान्गोभिरक्षाः सोमो दुग्धाभिरक्षाः च् समुद्रं न संवरणान्यग्मन्मन्दी मदाय तोशते

अ यत्सोम चित्रमुक्थ्यं दिव्यं पार्थिवं वसु च् तन्नः पुनान आ भर

अ वृषा पुनान आयुंषि स्तनयन्नधि बर्हिषि च् हरिः सन्योनिमासदः

अ युवं हि स्थः स्वःपती इन्द्रश्च सोम गोपती च् ईशाना पिप्यतं धियः

अ इन्द्रो मदाय वावृधे शवसे वृत्रहा नृभिः च् तमिन्महत्स्वाजिषूतिमर्भे हवामहे स वाजेषु प्र नो ऽविषत्

अ असि हि वीर सेन्यो ऽसि भूरि पराददिः च् असि दभ्रस्य चिद्वृधो यजमानाय शिक्षसि सुन्वते भूरि ते वसु

अ यदुदीरत आजयो धृष्णवे धीयते धनाम् च् युङ्क्ष्वा मदच्युता हरी कं हनः कं वसौ दधो ऽस्मां इन्द्र वसौ दधः

अ स्वादोरित्था विषूवतो मध्वः पिबन्ति गौर्यः च् या इन्द्रेण सयावरीर्वृष्णा मदन्ति शोभसे वस्वीरनु स्वराज्यम्

अ ता अस्य पृशनायुवः सोमं श्रीणन्ति पृश्नयः च् प्रिया इन्द्रस्य धेनवो वज्रं हिन्वन्ति सायकं वस्वीरनु स्वराज्यम्

अ ता अस्य नमसा सहः सपर्यन्ति प्रचेतसः च् व्रतान्यस्य सश्चिरे पुरूणि पूर्वचित्तये वस्वीरनु स्वराज्यम्

अ असाव्यंशुर्मदायाप्सु दक्षो गिरिष्ठाः च् श्येनो न योनिमासदत्

अ शुभ्रमन्धो देववातमप्सु धौतं नृभिः सुतम् च् स्वदन्ति गावः पयोभिः

अ आदीमश्वं न हेतारमशूशुभन्नमृताय च् मधो रसं सधमादे