सामवेदः

अ अचिक्रदद्वृषा हरिर्महान्मित्रो न दर्शतः च् सं सूर्येण दिद्युते

अ गिरस्त इन्द ओजसा मर्मृज्यन्ते अपस्युवः च् याभिर्मदाय शुम्भसे

अ तं त्वा मदाय घृष्वय उ लोककृत्नुमीमहे च् तव प्रशस्तये महे

अ गोषा इन्दो नृषा अस्यश्वसा वाजसा उत च् आत्मा यज्ञस्य पूर्व्यः

अ अस्मभ्यमिन्दविन्द्रियं मधोः पवस्व धारया च् पर्जन्यो वृष्टिमां इव

अ सना च सोम जेषि च पवमान महि श्रवः च् अथा नो वस्यसस्कृधि

अ सना ज्योतिः सना स्वार्विश्वा च सोम सौभगा च् अथा नो वस्यसस्कृधि

अ सना दक्षमुत क्रतुमप सोम मृधो जहि च् अथा नो वस्यसस्कृधि

अ पवीतारः पुनीतन सोममिन्द्राय पातवे च् अथा नो वस्यसस्कृधि

अ त्वं सूर्ये न आ भज तव क्रत्वा तवोतिभिः च् अथा नो वस्यसस्कृधि

अ तव क्रत्वा तवोतिभिर्ज्योक्पश्येम सूर्यम् च् अथा नो वस्यसस्कृधि

अ अभ्यर्ष स्वायुध सोम द्विबर्हसं रयिम् च् अथा नो वस्यसस्कृधि

अ अभ्यार्षानपच्युतो वाजिन्त्समत्सु सासहिः च् अथा नो वस्यसस्कृधि

अ त्वां यज्ञैरवीवृधन्पवमान विधर्मणि च् अथा नो वस्यसस्कृधि

अ रयिं नश्चित्रमश्विनमिन्दो विश्वायुमा भर च् अथा नो वस्यसस्कृधि

अ तरत्स मन्दी धावति धारा सुतस्यान्धसः च् तरत्स मन्दी धावति

अ उस्रा वेद वसूनां मर्त्तस्य देव्यवसः च् तरत्स मन्दी धावति

अ ध्वस्रयोः पुरुषन्त्योरा सहस्राणि दद्महे च् तरत्स मन्दी धावति

अ आ ययोस्त्रिंशतं तना सहस्राणि च दद्महे च् तरत्स मन्दी धावति

अ एते सोमा असृक्षत गृणानाः शवसे महे च् मदिन्तमस्य धारया

अ अभि गव्यानि वीतये नृम्णा पुनानो अर्षसि च् सनद्वाजः परि स्रव

अ उत नो गोमतीरिषो विश्वा अर्ष परिष्टुभः च् गृणानो जमदग्निना

अ इमं स्तोममर्हते जातवेदसे रथमिव सं महेमा मनीषया च् भद्रा हि नः प्रमतिरस्य संसद्यग्ने सख्ये मा रिषामा वयं तव

अ भरामेध्मं कृणवामा हवींषि ते चितयन्तः पर्वणापर्वणा वयम् च् जीवातवे प्रतरं साधया धियो ऽग्ने सख्ये म रिषामा वयं तव

अ शकेम त्वा समिधं साधया धियस्त्वे देवा हविरदन्त्याहुतम् च् त्वमादित्यां आ वह तान्ह्यूश्मस्यग्ने सख्ये मा रिषामा वयं तव

अ प्रति वां सूर उदिते मित्रं गृणीषे वरुणम् च् अर्यमणं रिशादसम्

अ राया हिरण्यया मतिरियमवृकाय शवसे च् इयं विप्रामेधसातये

अ ते स्याम देव वरुण ते मित्र सूरिभिः सह च् इषं स्वश्च धीमहि

अ भिन्धि विश्वा अप द्विषः परि बाधो जही मृधः च् वसु स्पार्हं तदा भर