इत्युक्तास्ते कुमारास्तु आचचक्षुर्यथातथम् । उग्रसेनाय मुसलं जज्ञे सांबस्य चोदरात्
तदुग्रसेनो मुसलमयश्चूर्णमकारयत् । जज्ञे तदेरकाचूर्णं प्रक्षिप्तं तैर्महोदधौ
मुसलस्याथ लोहस्य चूर्णितस्य तु यादवैः । खंडं चूर्णितशेषं तु ततो यत्तोमराकृति
तदप्यंबुनिधौ क्षिप्तं मत्स्यो जग्राह जालिभिः । घातितस्योदरात्तस्य लुब्धो जग्राह तज्जराः
विज्ञातपरमार्थोपि भगवान्मधुसूदनः । नैच्छत्तदन्यथा कर्त्तुं विधिना यत्समीहितम्
देवैश्च प्रहितो वायुः प्रणिपत्त्याह केशवम् । रहस्येवमहं दूतः प्रहितो भगवन्सुरैः
वस्वश्विमरुदादित्यरुद्र साध्यादिभिस्सह । विज्ञापयति शक्रस्त्वां तदिदं श्रूयतां विभो
भारावतरणार्थाय वर्षाणामधिकं शतम् । भगवानवतीर्णोत्र त्रिदशैस्सह चोदितः
दुर्वृत्ता निहता दैत्या भुवो भारोऽवतारितः । त्वया मनाथास्त्रिदशा भवंतु त्रिदिवे सदा
तदतीतं जगन्नाथ वर्षाणामधिकं शतम् । इदानीं गम्यतां स्वर्गो भवता यदि रोचते
देवैर्विज्ञाप्यते देव तथात्रैव रतिस्तव । तत्स्थीयतां यथाकालमास्थेयमनुजीविभिः
श्रीभगवानुवाच। यत्त्वमात्थाखिलं दूत वेद्म्येतदहमप्युत । प्रारब्ध एव हि मया यादवानां परिक्षयः
भुवो नाद्यापि भारोऽयं यादवैरनिबर्हितैः । अवतार्य करोम्येतत्सप्तरात्रेण सत्वरः
यथा गृहीतमंभोधेर्दत्त्वाहं द्वारकाभुवम् । यादवानुपसंहृत्य यास्यामि त्रिदशालयम्
मनुष्यदेहमुत्सृज्य संकर्षणसहायवान् । प्राप्त एवास्मि मंतव्यो देवेंद्रे ण तथाऽमरैः
जरासंधादयो येऽन्ये निहता भारहेतवः । क्षितेस्तेभ्यःकुमारोऽपि यदूनां नापचीयते
तदेतं सुमहाभारमवतार्य क्षितेरहम् । यास्याम्यमरलोकस्य पालनाय ब्रवीहि तान्
श्रीपराशर उवाच। इत्युक्तो वासुदेवेन देवदूतः प्रणम्य तम् । मैत्रेय दिव्यया गत्या देवराजांतिकं ययौ
भगवानप्यथोत्पातान्दिव्यभौमांतरिक्षजान् । ददर्श द्वारकापुर्य्यां विनाशाय दिवानिशम्
तान्दृष्ट्वा यादवानाह पश्यध्वमतिदारुणान् । महोत्पाताञ्छमायैषां प्रभासं याम मा चिरम्
श्रीपराशर उवाच। एवमुक्ते तु कृष्णेन यादवप्रवरस्ततः । महाभागवतः प्राह प्रणिपत्योद्धवो हरिम्
भगवन्यन्मया कार्यं तदाज्ञापय सांप्रतम् । मन्ये कुलमिदं सर्वं भगवान्संहरिष्यति
नाशायास्य निमित्तानि कुलस्याच्युत लक्षये
श्रीभगवानुवाच। गच्छ त्वं दिव्यया गत्या मत्प्रसादसमुत्थया । यद्बदर्याश्रमं पुण्यं गंधमादनपर्वते । नरनारायणस्थाने तत्पवित्रं महीतले
मन्मना मत्प्रसादेन तत्र सिद्धिमवाप्स्यसि । अहं स्वर्गं गमिष्यामि ह्युपसंहृत्य वै कुलम्
द्वारकां च मया त्यक्तां समुद्र ः! प्लावयिष्यति । मद्वेश्म चैकं मुक्त्वा तु भयान्मत्तो जलाशये । तत्र सन्निहितश्चाहं भक्तानां हितकाम्यया
श्रीपराशर उवाच। इत्युक्तः प्रणिपत्यैनं जगामाशु तपोवनम् । नरनारायणस्थानं केशवेनानुमोदितः
ततस्ते यादवास्सर्वे रथानारुह्य शीघ्रगान् । प्रभासं प्रययुस्सार्द्धं कृष्णरामादिभिर्द्विज
प्रभासं समनुप्राप्ताः कुकुरांधकवृष्णयः । चक्रुस्तत्र महापानं वासुदेवेन चोदिताः
पिबतां तत्र चैतेषां संघर्षेण परस्परम् । अतिवादेंधनो जज्ञे कलहाग्निः क्षयावहः