इतुक्त्वा तदूगृहात् कृष्णो बलदेवसहायवान् । निर्ज्जगाम मुनिश्वेष्ठ! मालाकारेण पूजितः ।। ५-१९-
श्रीपराशर उवाच। राजमार्गे ततः कृष्णस्सानुलेपनभाजनाम् । ददर्श कुब्जामायांतीं नवयौवनगोचराम्
तामाह ललितं कृष्णः कस्येदमनुलेपनम् । भवत्या नीयते सत्यं वदेंदीवरलोचने
सकामेनेव सा प्रोक्ता सानुरागा हरिं प्रति । प्राह सा ललितं कुब्जा तद्दर्शनबलात्कृता
कांत कस्मान्न जानासि कंसेन विनियोजिताम् । नैकवक्रेति विख्यातामनुलेपनकर्मणि
नान्यपिष्टं हि कंसस्य प्रीतये ह्यनुलेपनम् । भवाम्यहमतीवास्य प्रसादधनभाजनम्
श्रीकृष्ण उवाच। सुगंधमेतद्रा जार्हं रुचिरं रुचिरानने । आवयोर्गात्र सदृशं दीयतामनुलेपनम्
श्रीपराशर उवाच। श्रुत्वैतदाह सा कुब्जा गृह्यतामिति सादरम् । अनुलेपनं च प्रददौ गात्रयोग्यमथोभयोः
भक्तिच्छेदानुलिप्तांगौ ततस्तौ पुरुषर्षभौ । सेंद्र चापौ व्यराजेतां सितकृष्णाविवांबुदौ
ततस्तां चुबुके शौरिरुल्लापन विधानवित् । उत्पाट्य तोलयामास द्व्यंगुलेनाग्रपाणिना
चकर्ष पद्भ्यां च तदा ऋजुत्वं केशवोऽनयत् । ततस्सा ऋजुतां प्राप्ता योषितामभवद्वरा
विलासललितं प्राह प्रेमगर्भभरालसम् । वस्त्रे प्रगृह्य गोविंदं मम गेहं व्रजेति वै
एवमुक्तस्तया शौरी रामस्यालोक्य चाननम् । प्रहस्य कुब्जां तामाह नैकवक्रामनिंदिताम्
आयास्ये भवतीगेहमिति तां प्रहसन्हरिः । विससर्ज जहासोच्चै रामस्यालोक्य चाननम्
भक्तिभेदानुलिप्तांगौ नीलपीतांबरौ तु तौ । धनुश्शालां ततो यातौ चित्रमाल्योपशोभितौ
आयागं तद्धनूरत्नं ताभ्यां पृष्टैस्तु रक्षिभिः । आख्याते सहसा कृष्णो गृहीत्वा पूरयद्धनुः
ततः पूरयता तेन भज्यमानं बलाद्धनुः । चकार सुमहच्छब्दं मथुरा येन पूरिता
अनुयुक्तौ ततस्तौ तु भग्ने धनुषि रक्षिभिः । रक्षिसैन्यं निहत्योभौ निष्क्रांतौ कार्मुकालयात्
अक्रूरागमवृत्तांतमुपलभ्य महद्धनुः । भग्नं श्रुत्वा च कंसोऽपि प्राह चाणूरमुष्टिकौ
कंस उवाच। गोपालदारकौ प्राप्तौ भवद्भ्यां तु ममाग्रतः । मल्लयुद्धेन हंतव्यौ मम प्राणहरौ हि तौ
नियुद्धे तद्विनाश्नो भवद्भ्यां तोषितो ह्यहम् । दास्याम्यभिमतान्कामान्नान्यथैतौ महाबलौ
न्यायतोन्यायतो वापि भवद्भ्यां तौ ममाहितौ । हंताव्यौ तद्वधाद्रा ज्यं सामान्यं वां भविष्यति
इत्यादिश्य स तौ मल्लौ ततश्चाहूय हस्तिपम् । प्रोवाचोच्चैस्त्वया मल्लसमाजद्वारि कुंजरः
स्थाप्यः कुवलयापीडस्तेन तौ गोपदारकौ । घातनीयौ नियुद्धाय रंगद्वारमुपागतौ
तमप्याज्ञाप्य दृष्ट्वा च सर्वान्मंचानुपाकृतान् । आसन्न मरणः कंसः सूर्योदयमुदैक्षत
ततः समस्तमंचेषु नागरस्स तदा जनः । राजमंचेषु चारूढास्सह भृत्यैर्नराधिपाः
मल्लप्राश्निकवर्गश्च रंगमध्यसमीपगः । कृतः कंसेन कंसोऽपि तुंगमंचे व्यवस्थितः
अंतःपुराणां मंचाश्च तथाऽन्ये परिकल्पिताः । अन्ये च वारमुख्यानामन्ये नागरयोषिताम्
नंदगोपादयो गोपा मंचेष्वन्येष्ववस्थिताः । अक्रूरवसुदेवौ च मंचप्रांते व्यवस्थितौ
नागरीयोषितां मध्ये देवकीपुत्रगर्द्धिनी । अंतकालेऽपि पुत्रस्य द्रक्ष्यामीति मुखं स्थिता