वायुपुराणम्

महामूलैर्महास्कन्धैः स्निग्धवर्णैर्विभूषिता। नवैः सदा पुष्पफलैः शाखाभिश्चोपशोभिता ।। ३५.

तस्या ह्यतिप्रमाणानि स्वादूनि च मृदूनि च। फलान्यमृतकल्पानि पतन्ति गिरिमूर्द्धनि ।। ३५.

तस्माद्गिरिवरप्रस्थात् पुनः प्रस्यन्दवाहिनी। नदी जम्बूनदी नाम प्रवृत्ता मधुवाहिनी ।। ३५.

तत्र जाम्बूनदन्नाम सुवर्णं ज्वलनप्रभम्। देवालङ्कारमतुलं जायते पापनाशनम् ।। ३५.

देवदानवगन्धर्वा यक्षराक्षसपन्नगाः। यत् पिबन्त्यमृतप्रख्यं मधु जाम्भूरसस्रवम् ।। ३५.

स केतुर्दक्षिणे द्वीपे जम्भूर्लोकेषु विश्रुता। यस्या नाम्ना स विख्यातो जम्भूद्वीपः सनातनः ।। ३५.

विपुलस्यापि शैलस्य पश्चिमस्य महात्मनः। जातः श्रृङ्गेऽतिसुमहानश्वत्थ श्चैव पादपः ।। ३५.

विलम्बिवरमालाद्यः सुवर्णमणिवेदिकः। महोच्चस्कन्धविटपो नैकसत्त्वगुणालयः ।। ३५.

कुम्भप्रमाणैः सुखदैः फलैः सर्वर्त्तुकैः शुभैः। स केतुः केतुमालानां देवगन्धर्वसेवितः ।। ३५.

केतुमालेति च यथा तस्या नाम प्रकीर्तितम्। तन्निबोधत विप्रेन्द्रा निरुक्तं नाम कर्मतः ।। ३५.

क्षीरोदमथने वृत्ते दैत्यपक्षे पराजिते। महासमरसम्मर्दवृक्षक्षोभविमर्दिता ।। ३५.

सहस्राक्षेण विहिता माला तस्य सुतानिता। तस्य स्कन्धे समासक्त्या ह्यश्वत्थस्य वनस्पतेः ।। ३५.

सा तथैव महागन्धा ह्यम्लाना सर्वकामिकी। इज्यते सुमहाभागा विविधैः सिद्धचारणैः ।। ३५.

तस्य केतोः सदा माला देवदत्ता विराजते। पवनेनेरिता दिव्यं वाति गन्धं मनोरमम् ।। ३५.

ताभ्यां नामाङ्कितो द्वीपः पश्चिमे बहुविस्तरः। केतुमाल इति ख्यातो दिवि चेह च सर्वशः ।। ३५.

स्वपार्श्वस्योत्तरे चापि श्रृङ्गे जातो महाद्रुमः । न्यग्रोधो विपुलस्कन्धोऽनेकयोजनमण्डलः ।। ३५.

माल्यदामकलापैश्च विविधैर्गन्धशालिभिः। शाकाविलम्बी शुशुभे सिद्धचारणसेवितः ।। ३५.

प्रवालकुम्भसदृशैर्मधुपूर्णैः फलैः सदा। स ह्युत्तर कुरूणान्तु केतुवृक्षः प्रकाशते ।। ३५.

सनत्कुमारावरजा मानसा ब्रह्मणः सुताः। सप्त तत्र महाभागाः कुरवो नाम विश्रुताः ।। ३५.

तत्र तैरागतज्ञानैः सत्त्वस्थैः पुण्यकीर्तिभिः। अक्षयं क्षेममपरं लोकं प्राप्तं सनातनम् ।। ३५.

तेषां नामाङ्कितो द्वीपः सप्तानां वै महात्मनाम् । दिवि चेह च विख्याता उत्तराः कुरवः सदा ।। ३५.

तेषां चतुर्णां वक्ष्यामि शैलेन्द्राणां यथाक्रमम्। अनुबन्धानि रम्याणि सर्वकालर्त्तुकानि च ।। ३६.

सारिकाभिर्मयूरैश्च चकोरैश्च मदोत्कटैः। शुकैश्च भृङ्गराजैश्च चित्रकैश्च समन्ततः ।। ३६.

जीवञ्जीवकनादैश्च हेमकानाञ्च नादितैः। मत्तकोकिलनादैश्च वल्गूनाञ्च निनादितैः ।। ३६.

सुग्रीवकाञ्चनरवैः कलविङ्करुतैस्तथा। कूजितान्तरशब्दैश्च सुरम्याणि च सर्वशः ।। ३६.

मदात्कटैर्मधुरैश्च भ्रमरैश्च महालसैः। उपगीतवनान्तानि किन्नरैश्च व्कचित् व्कचित् ।। ३६.

पुष्पवृष्टिं विमुञ्चन्ति मन्दमारुतकम्पिताः। तरवो यत्र दृश्यन्ते चारुपल्लवशोभिताः ।। ३६.

स्तबकैर्मञ्जरीभिश्च ताम्रैः किसलयैस्तथा। मन्दवातवशाल्लोलैर्दोलयद्भिर्युतानि च ।। ३६.

नानाधातुविचित्रैश्च कान्तरूपैः शिलाशतैः। शल्लैः व्कचिद्द्विजश्रेष्ठा विन्यस्तैः शोभितानि च ।। ३६.