वायुपुराणम्

हिंसासूयानृतं माया वधश्चैव तपस्विनाम्। एते स्वभावास्तिष्यस्य साधयन्ति च वै प्रजाः ।। ५८.

एष धर्मः कृतः कृत्स्नो धर्मश्च परिहीयते। मनसा कर्मणा स्तुत्या वार्त्ता सिद्ध्यति वा न वा ।। ५८.

कलौ प्रमारको रोगः सततं क्षुद्भयानि वै। अनावृष्टिभयं घोरं दर्शनञ्च विपर्ययम् ।। ५८.

न प्रमाणं स्मृतेरस्ति तिष्ये लोके युगे युगे। गर्भस्थो म्रियते कश्चिद्यौवनस्थस्तथापरः । स्थाविरे मध्यकौमारे म्रियन्ते वै कलौ प्रजाः ।। ५८.

अधार्मिकास्त्वनाचारास्तीक्ष्ण कोपाल्पतेजसः। अनृतब्रुवश्च सततं तिष्ये जायन्ति वै प्रजाः ।। ५८.

दुरिष्टैर्दुरधीतैश्च दुराचारैर्दुरागमैः। विप्राणां कर्मदोषैस्तैः प्रजानां जायते भयम् ।। ५८.

हिंसा माया तथेर्ष्या च क्रोधोऽसूयाक्षमानृतम्। तिष्ये भवन्ति जन्तूनां रागो लोभश्च सर्वशः ।। ५८.

संक्षोभो जायतेऽत्यर्थं कलिमासाद्य वै युगम्। नाधीयन्ते तदा वेदा न यजन्ते द्विजातयः। उत्सीदन्ति नराश्चैव क्षत्रियाः सविशः क्रमात् ।। ५८.

क्षुद्राणामन्त्ययोनेस्तु सम्बन्धा ब्राह्मणैः सह। भवन्तीह कलौ तस्मिन् शयनासनभोजनैः ।। ५८.

राजानः शूद्रभूयिष्ठा पाषण्डानां प्रवर्तकाः। भ्रूणहत्याः प्रजास्तत्र प्रजा एवं प्रवर्त्तते ।। ५८.

आयुर्मेधा बलं रूपं कुलञ्चैव प्रहीयते। शूद्राश्च ब्राह्मणाचाराः शूद्राचाराश्च ब्राह्मणाः ।। ५८.

राजवृत्ते स्थिताश्चौराश्चौरवृत्ताश्च पार्थिवाः। भृत्याश्च नष्टसुहृदो युगान्ते पर्युपस्थिते ।। ५८.

अशीलिन्योऽव्रताश्चापि स्त्रियो मद्यामिषप्रियाः। मायामात्रा भविष्यन्ति युगान्ते प्रत्युपस्थिते ।। ५८.

श्वापदप्रबलत्वञ्च गवाञ्चैवाप्युपक्षयः। साधूनां विनिवृत्तिश्च विद्यात्तस्मिन् कलौ युगे ।। ५८.

तदा सूक्ष्मे महोदर्को दुर्लभो भोगिनां तथा। चतुराश्रमशैथिल्याद्धर्मः प्रविचलिष्यति ।। ५८.

तदा ह्यल्पफला देवी भवेद्भूमिर्महीयसी। शूद्रास्तपश्चरिष्यन्ति युगान्ते प्रत्युपश्थिते ।। ५८.

तदा ह्यैकाहिको धर्मो द्वापरे यश्च मासिकः। त्रेतायां वत्सरस्थश्च एकाहादतिरिच्यते ।। ५८.

अरक्षितारो हर्त्तारो बलिभागस्य पार्थिवाः। युगान्तेषु भविष्यन्ति स्वरक्षणपरायणाः ।। ५८.

अक्षत्रियाश्च राजानो विशः शूद्रोपजीविनः। शूद्राभिवादिनः सर्वे युगान्ते द्विजसत्तमाः ।। ५८.

पतयश्च भविष्यन्ति बहवोऽस्मिन् कलौ युगे। चित्रवर्षी तदा देवो यदा स्यात्तु युगक्षयः ।। ५८.

सर्वे वाणिजकाश्चापि भविष्यन्त्यधमे युगे। भूयिष्ठं कूटमानैश्च पण्यविक्रीततेजनैः ।। ५८.

कुशीलचर्या पाषण्डैर्वृथारूपैः समावृतम्। पुरुषाल्पं बहुस्त्रीकं युगान्ते पर्युपस्थिते ।। ५८.

बहुयाचनको लोको भविष्यति परस्परम्। क्रव्यादनः क्रूरवाक्यो नार्जवो नानसूयकः ।। ५८.

न कृते प्रतिकर्ता च क्षीणो लोको भविष्यति। अशङ्का चैव पतिते तद्युगान्तस्य लक्षणम् ।। ५८.

नरशून्या वसुमती शून्या चैव भविष्यति। मण्डलानि भवन्त्यत्र देशेषु नगरेषु च ।। ५८.

अल्पोदका चाल्पफला भविष्यति वसुन्धरा। गोप्तारश्चाप्यगोप्तारः प्रभविष्यन्त्यशासनाः ।। ५८.

हर्त्तारः पररत्नानां परदारप्रधर्षकाः। कामात्मानो दुरात्मानो ह्यधर्मात् साहसप्रियाः ।। ५८.

अनष्टचेतनाः पुंसो मुक्तकेशास्तु चूलिकाः। ऊनषोडशवर्षाश्च प्रजायन्ते युगक्षये ।। ५८.

शुक्लदन्ता जिताक्षाश्च मुण्डाः काषायवाससः। शूद्रा धर्मञ्चरिष्यन्ति युगान्ते पर्युपस्थिते ।। ५८.