वराहपुराणम्

विद्योतयन्दिशः सर्वास्त्रिदशैः परिवारितः

कामगं रथमारुह्य महेन्द्रः समरुद्गणः 214.

गणावृतश्च वरदो वरुणो यादसांपतिः

तप्तकाञ्चनवर्णेन रत्नचित्रेण भास्वता

विमानशत कोटीभिरागतो यक्षराक्षसैः

अधिष्ठितः सुकृतिभिः प्रायाद्वैवस्वतोपमः

विमानैरग्नितुल्याभैराजग्मुः खान्महीधरम्

आगतावश्विनौ देवौ मौञ्जवन्तं महागिरिम्

संछाद्यैरावतपथं सहसाभ्याययुर्द्रुतम्

संप्राप्तस्तं गिरिवरं मयूरशतनादितम्

हाहाहूहूस्तथा चान्ये सर्वे गन्धर्वसत्तमाः

अनिलश्चानलश्चैव धर्मः सत्यो ध्रुवोऽपरः 214.

गुह्यकाश्च महात्मानः सर्व एव समागताः

उर्वशी मेनका रंभा पंचस्या च तथापरा

पुलस्त्योऽत्रिर्मरीचिश्च वसिष्ठो भृगुरेव च

भारद्वाजोऽग्निवेश्यश्च तथा वृद्धपराशरः

मरीचिर्जमदग्निश्च भार्गवश्च्यवनस्तथा

शतद्रूश्च विपाशा च गंडकी च सरिद्वरा

गोदावरी च वेणी च तापी च सरिदुत्तमा

नंदा च परनन्दा च तथा चर्मण्वती नदी

सिंधुश्च पुरुषश्चैव प्रभासः सोम एव च 214.

अन्यानि चापि मेदिन्यां तीर्थान्यायतनानि च

निजस्वरूपेणाजग्मुस्तत्र पुण्यान्यनेकशः

शैलोत्तमो महामेरुः कैलासो गन्धमादनः

विन्ध्यो महेन्द्रः सह्यश्च मलयो दर्दुरस्तथा

आगताः सर्व एवैते शैलेन्द्राः काननौकसः

सर्वे यज्ञाः सर्वविद्या वेदाश्चत्वार एव च

वासुकिश्च महाभागश्चामृताशी भुजङ्गराट्

फणींद्रो धृतराष्ट्रश्च किर्मीराङ्गश्च नागराट्