वराहपुराणम्

शुभव्रतं धन्यव्रतं कान्तिव्रतमतः स्मृतम्

शान्तिव्रतं कामव्रतमारोग्यव्रतमेव च

पुराणस्तवनं चैव नारायणेश्वरेण च

ततो भुवनकोशस्य वर्णनं समुदाहृतम्

भारतादिसमुद्देशः सृष्टिसम्भाग एव च

शक्तिमाहात्म्यकथनं महिषासुरघातनम्

श्वेतोपाख्यानमत्रोक्तं तिलधेनुविधिस्ततः

ततश्च शर्क्कराधेनोर्मधुधेनोस्ततः परम् 218.

धान्यधेनुश्च भगवच्छास्त्रलक्षणमेव च

ततो भागवतानां च लक्षणं परिकीर्त्तितम्

नानामन्त्रास्ततः प्रोक्ता देवोपकरणे विधिः

वियोनिगर्भमोक्षश्च कोकामुखप्रशंसनम्

रूपकारणमत्रोक्तं मायाचक्रं ततः परम्

कंकृताञ्जनदर्पाणां मन्त्राः प्रोक्तास्ततः परम्

दन्तकाष्ठाद्यकरणे प्रायश्चित्तं ततः परम्

नीलवस्त्रपरिधाने क्रोधयुक्तस्य चार्चने

कृष्णवस्त्रपरिधाने धौतवस्त्रस्य धारणे

दीपोच्छिष्टस्य तैलस्य करलेपेन पूजने 218.

पिण्याकभक्षणे चैव उपानद्गूढपादके

सूकरक्षेत्रमहिमा ततो जम्बूकगृध्रयोः

बदरीषण्डमाहात्म्यं गुह्यधर्मप्रकीर्तनम्

सोमेश्वरस्य महिमा मुक्तिक्षेत्रस्य चापि हि।। त्रिवेण्याश्चैव माहात्म्यं माहात्म्यं गण्डकीभवम्

चक्रतीर्थस्य महिमा हरिक्षेत्रसमुद्भवः

गोनिष्क्रमस्य महिमा द्वारवत्यास्ततः परम्

मथुरातीर्थमाहात्म्यं प्रादुर्भावस्तथैव च

देवारण्यस्य माहात्म्यं चक्रतीर्थस्य चोत्तमम्

तथा आख्यायिकायुक्तं विश्रान्तेश्च ततः परम्

यमुनोद्भेदमहिमा कालिञ्जरसमुद्भवाः 218.

मधुकप्रतिमायाश्च स्थापनं संप्रकीर्तितम्