पूर्व उत्तरतश्चापि हिरण्यो राक्षसेश्वर
भारतो दक्षिणे प्रोक्तो हरिर्दक्षिणपशचिमे
उत्तरे च कुरुर्वर्षः कल्पवृक्षसमावृतः
इलावृताद्या ये चाष्टौ वर्षं मुक्त्वैव भारतम्
विपर्ययो न तेष्वस्ति नोत्तमाधममध्यमाः
सागरान्तरिताः सर्वे अगम्याश्च परस्परम्
नागद्वीपः कटाहश्च सिंहलो वारुणस्तथा
कुमाराख्यः परिख्यातो द्वीपो ऽयं दक्षिणोत्तरः
आन्ध्रा दक्षिमते वीर तुरुष्कास्त्वपि चोत्तरे
इज्यायुद्धवणिज्याद्यैः कर्मभिः कृतपावनाः
विन्ध्यश्च पारियात्रश्च सप्तात्र कुलपर्वताः
विस्तारोच्छ्रायिणो रम्या विपुलाः शुभसानवः
वातन्धमो वैद्युतश्च मैनाकः सरसस्तथा
उज्जायनः पुष्पगिरिरर्बुदो रैवतस्तथा
श्रीपर्वतः कोङ्गणश्च शतशऽन्ये ऽपि पर्वताः
तैः पीयन्ते सरिच्छ्रेष्ठा यास्ताः सम्यङ् निशामयः
शतद्रुश्चन्द्रिका नीला वितस्तैरावती कुहूः
गोमती धूतपापा च बाहुदा सदृषद्वती
सरूश्च सलौहित्या हिमवत्पादनिःसृताः
पर्णाशा नन्दिनी चैव पावनी च मही तथा
सिप्रा ह्यवन्ती च तथा पारियात्राश्रयाः स्मृताः
मन्दाकिनी दशार्णा च चित्रकूटापवाहिका
तथान्या पिप्पलश्रोणी विपाशा वञ्जुलावती
ऋक्षपादप्रसूता च तथान्या बलवाहिनी
वेण वैतरणी चैव सिनीवाहुः कुमुद्वती
विन्ध्यपादप्रसूताश्च नद्यः पुण्यजलाः शुभाः
तुङ्गभद्रा सुप्रयोगा वाह्या कावेरिरेव च
एतास्त्वपि महानद्यः सह्यपादविनिर्गताः
सिनी चैव सुदामा च शुक्तिमत्प्रभवास्त्विमाः
जगतो मातरः सर्वाः सर्वाः सागरयोषितः