सुवर्णब्रह्मदात्रे च सर्वदात्रे च ते नमः
परब्रह्म नमस्ते ऽस्तु शब्दब्रह्म नमो ऽस्तु ते
बुद्धिस्त्वमपि बोध्यश्च बोधस्त्वं च नमो ऽस्तु ते
पाता पोता च पुतश्च पावनीयश्च ॐ नमः
हर्त्ता नेता च नीतिश्च पूज्यो ऽग्र्यो विश्वधार्यसि
यज्ञपात्राणेयस्त्वमेकधा बहुधा त्रिधा
ज्ञाता ज्ञेयस्तथा ज्ञानं ध्येयो ध्यातासि चेश्वर
योगाङ्गानि त्वमीशानः सर्वगस्त्वं नमो ऽस्तु ते
दीक्षा त्वं त्वं पुरोडाशस्त्वं पशुः पशुवाह्यसि
महाजनो निरयनः सहस्रार्केन्दुरूपवान्
कालचक्रो भवानीशो नमस्ते पुरुषोत्तमः
नरेश्वरो ऽथ ब्रह्मेशः सूर्येशस्त्वं नमो ऽस्तु ते
मित्रावरुणमूर्तिस्त्वममूर्तिरनघः परः
त्वमूर्ध्वकर्त्ता ऊर्ध्वश् च ऊर्ध्वरेता नमो ऽस्तु ते
अनीशः सर्वपापेभ्यस्त्वामहं शरणं गतः
महेश्वरेण कथितं वाराणस्यां पुरा मुने
उपशान्तस्तथा जातो रुद्रः पापवशात् ततः
विमुक्तपापो ह्युपशान्तमूर्ति संपूज्यते देववरैः प्रसिद्धैः
येन सम्यगधीतेन पापं नाशं तु गच्चति
हयशीर्षं नमस्ते ऽहं भवं विष्णुं त्रिविक्रमम्
नारायणं नमस्ये ऽहं नमस्ये गरुडासनम्
कामपालमखण्डं च नमस्ये ब्राह्मणप्रियम्
हंसं शंभुं नमस्ये च ब्रह्माणं सप्रजापतिम्
शिवं विष्णुं सुवर्णाक्षं गोपतिं पीतवाससम्
अर्धनारीश्वरं देवं नमस्ये पापनाशनम्
नमस्ये विश्वरूपं च सौगन्धिं सर्वदाशिवम्
नमस्ये पुष्कराक्षं च पयोगन्धिं च केशवम्
उपशान्तं तमस्ये ऽहं मार्कण्डेयं सजम्बुकम्
कार्त्तिकेयं नमस्ये ऽहं बाह्लीकं शिखिनं तथा
नमस्ये लाङ्गलीशं च नमस्ये ऽहं श्रियः पतिम्