कारण्डवसमाकीर्णं राजहंसोपशोभितम्
कमलैः शतपत्रैश्च काञ्चनैः समलङ्कृतम्
गुल्मैः कीचकवेणूनां समन्तात् परिवेष्टितम्
आसीद् ग्राहो गजेन्द्राणां रिपुराकेकरेक्षमः
मदस्रावी जलाकाङ्क्षी पादचारीव पर्वतः
गजो ह्यञ्जनसंकाशो मदाच्चलितलोचनः
सलीलः पङ्कजवने यूथमध्यगतश्चरन्
पश्यन्तीनां करेणूनां क्रोशन्तीनां च दारुणम्
वारुणैः संयतः पाशैर्निष्प्रयत्नगतिः कृतः
विस्फूर्य च यथाशक्ति विक्रोसंश्च महारवान्
परमापदमापन्नो मनसाचिन्तयद्धरिम्
तमेव शरणं देवं गतः सर्वात्मना तदा
जन्मजन्मान्तराभ्यासात् भक्तिमान् गरुडध्वजे
मथितामृतफेनाभं शङ्खचक्रगदाधरम्
आपद्विमोक्षमन्विच्छन् गजः स्तोत्रमुदीरयत्
अनाश्रिताय देवाय निःस्पृहाय नमो ऽस्तु ते
अन्तराय चैकाय अव्यक्ताय नमो नमः
अप्रर्क्याप्रमेयाय अतुलाय नमो नमः
सनातनाय पूर्वाय पुराणाय नमो नमः
नमो जगत्प्रतिष्ठाय गोविन्दाय नमो नमः
विश्वेश्वराय देवाय शिवाय हरये नमः
नारायणाय विश्वाय देवानां परमात्मने
श्रीशार्ङ्गचक्रासिगदाधराय नमो ऽस्तु तस्मै पुरुषोत्तमाय
ब्रह्मेन्द्ररुद्रमुनिचारणसंस्तुताय देवोत्तमाय वरदाय नमो ऽच्युताय
पीताम्बराय मधुकैटभनाशनाय विश्वाय चारुमुकुटाय नमो ऽजराय
नानाविचित्रमुकुटाङ्गदभूषणाय सर्वेश्वराय वरदाय नमो वराय
देवेन्द्रविघ्नशमनोद्यतपौरुषाय योगेश्वराय विरजाय नमो वराय
नारायणायात्महितायनाय महावराहाय नमस्करोमि
युगान्तशेषं पुरुषं पुराणं तं देवदेवं शरणं प्रपद्ये
क्षेत्रज्ञमात्मप्रभवं वरेण्यं तं वासुदेवं शरणं प्रपद्य