धूतपापा महारावं कर्णा विद्रुमसंनिभम्
यज्ञबाहुं विशाला च सरस्वत्यो ददुर्गणान्
करालं सितकेशं च कृष्णकेशं जटाधरम्
सोमाप्ययनमेवोग्रं देवयाजिनमेव च
कूर्मग्रीवं च पञ्चैतान् ददुः पुत्राय कृत्तिकाः
पिण्डाकारं च पञचैतान् ददुः स्कन्दायट चर्षयः
चाषवक्त्रं च जम्बूकं ददौ तीर्थः पृथूदकः
गणं पञ्चशिखं नाम ददौ कनखलः स्वकम्
सर्वौञ्जसं माहिषकं मानसः पिङ्गलं यथा
वसुदामां सोमतीर्थः प्रभासो नन्दिनीमपि
सप्तसारस्वतः प्रादान्मातरश्चतुरोद्भुताः
एकचूडां नागतीर्थः कुरुक्षेत्रं पलासदाम्
चौण्डीं भैण्डीं योगभैण्डीं प्रादाच्चरणपावनः
शकघण्टां शतानन्दां तथोलूखलमेखलाम्
सुषमामैकचूडां च देवीं धमधमां तथा
सुनक्षत्रां कद्रुलां च सुप्रभातां मुङ्गलाम्
कोटरामूर्ध्वणीं च श्रीमतीं बहुपुत्रिकाम्
सूपलां मधुकुम्भां च ख्यातिं दहदहां पराम्
संतानिकां विकलिकां क्रमश्चत्वरवासिनीम्
रौद्रा कर्कटिका तुण्डा श्वेततीर्थो ददौ त्विमाः
ददौ मयूरं स्वसुतं महाजवं तथारुणस्ताम्रचूडं च पुत्रम्
मालां हरिः शूलधरः पताकां कण्ठे च हारं मघवानुरस्तः
सैन्याधिपत्ये स कृतो भवेन रराज सूर्येव महावपुष्मान्
प्रणिपत्य भवं भक्त्या गिरिजां पावकं शुचिम्
ब्रह्माणं च नमस्कृत्य इदं वचनमब्रवीत्
युष्मत्प्रसादाज्जेष्यामि शत्रू महिषतारकौ
दीयतां ब्रह्मणा सार्द्धमनुज्ञ मम साम्प्रतम्
मुखं निरीक्षन्ति सुराः स्रेवे विगतसाध्यमाः
आदाय दक्षिणे पाणौ स्कन्दान्तिकमुपागमत्
वन्दस्व चरणौ दिव्यौ विष्णोर्लोकनमस्कृतौ