किंनरा देवगन्धर्वा ह्यप्सराश्च वरांगनाः
यक्षा गुह्यकसंघाश्च पिशाचोरगराक्षसाः
उपासांचक्रिरे तत्र देवदेवमुमापतिम् उवाच श्लक्ष्णया वाचा शंकरं जगदाश्रयम्
पश्य एतान्महाभागान्ध्यायमानांस्तवाश्रितान् ।।5.1.47.
नानुपेक्ष्याश्च तान्सर्वान्वातवर्षातपार्दितान्
यथायोग्यं वासनार्थं स्थानं परमशोभनम्
एषा मे वासना स्वामिन्भवतां यदि रोचते कल्पयामास पुरीं रम्यां सर्वभूतमनोरमाम्
बहुयोजनविस्तीर्णां दिव्यां दिव्यजनप्रियाम्
दिव्याभिप्रायसंयुक्तां दिव्यस्थानमनोरमाम्
क्रयविक्रयसंपन्नहट्टाट्टालकचत्वराम्
स्फाटिकाभित्तिरचितां वैडूर्यमणिभूमिकाम्
आरक्तमणिदेहल्यां द्वारशाखाभिमंडिताम्
मणिरत्नसमाभूमिद्वाराजिरगृहांतराम्
हेमस्तं भध्वजोपेताः पताकाश्च गृहेगृहे 5.1.47.
वापीकूपतडागानि सरांसि विमलानि च
हंसकारंडवाकीर्णां शिखंडिगणशोभिताम्
क्वचिन्नृत्यंति मयूराः क्वचित्कूजंति कोकिलाः
नरनारीगणाकीर्णां वर्णाश्रमनिषेविताम्
चंद्रमालाकृतश्रेणीतोरणानीव च शोभते
यत्रालकापुरी रम्या कुबेरभवनांकिता
तत्र भोगवती दिव्या वरुणालय उत्तमः
संयमनीपुरी श्रेष्ठा धर्मराजेन पालिता
देवतानां पुरी रम्या वासवेनाभिरक्षिता
एवंविधानि रम्याणि पुरा बहुतराणि च 5.1.47.
क्वचिद्रंभाकृतद्वारा यवांकुरघटाः शुभाः
क्वचिद्बालाः पठंति स्म वेदाध्ययनका द्विजाः
क्वचिच्चावभृथस्नाताः क्वचिद्दानान्यकुर्वत
क्वचिदारामपूर्तं वै क्वचिद्यात्रावधारणम्
क्वचित्कथाप्रसंगांश्च परिशंसंति वाचकाः
क्वचिन्मल्ला नियुध्यंते नटा नाट्यपराः क्वचित्