दत्तार्घा भूधरेंद्रेण कृतासन परिग्रहाः
दत्तेत्युक्ता गिरींद्रेण निरूप्योद्वाहवासरम्
ऊचुस्ते शंकरं सर्वे दत्ता हिमवता शिवा
चक्रुर्विवाह सामग्रीं ब्रह्मेन्द्रादिसुरास्तदा
शंखदुंदुभिनादैश्च ब्रह्माद्यैरमरैः सह
विवाह्येमां विधानेन जगाम स्वालयं पुनः
तावत्त्रस्तैः सुरैरग्निः प्रेषितोऽगान्महेश्वरम्
निचिक्षेप मुखे वह्नेः स्वरेतो व्रीडितो भृशम् 5.1.34.
हररेतोऽग्निनोद्गीर्णं गंगामध्ये पपात ह
सप्तर्षीणां च षट्पत्न्यः स्नानार्थं जाह्नवीं ययुः
मत्वाग्निमिति ताः सर्वास्तपंति स्म यथेच्छया
षडाननं समारूढं श्रोणिद्वारेण सत्वरम्
चिंतां जग्मुस्तदा सर्वा मुनित्रासात्ततो भयात्
षड्भिरेकत्वमापद्य श्वेतपर्वतमस्तके
शुक्लायां प्रतिपद्यासीद्द्वितीयायां समीकृतः
चतुर्थ्यां परिपूर्णांगः षण्मुखो द्वादशेक्षणः
तेजसा श्वेतताम्रेण तताप स जगत्त्रयम्
समागत्यास्य संस्कारं ब्रह्मा चक्रे यथाविधि 5.1.34.
ततो गौर्या मयूरश्च वाहने परिकल्पितः
शूलेन कृत्तिकाभिश्च वर्धितः पुत्रकाम्यया
शक्तिहस्तोऽभिषिक्तस्तु देवसेनासमादृतः
गांगेयः कार्तिकेयश्च गुहः स्कंद उमासुतः
कुमारः शक्तिधारी च तस्य नामानि षोडश
एवं जातो महासेनो दानवानां क्षयकरः
अभिषिक्तः स तेनासौ भद्रितः स जटाः पुरा
कृताभिषेकं लब्धास्त्रं महासेनं महेश्वरः
रक्षा कार्या त्वया पुत्र सामरस्य शतक्रतोः
इत्थं महोत्सवे जाते दृप्तप्रमथसागरे 5.1.34.
तासामाहारसंज्ञाभिश्चक्रे नामानि शंकरः
वटभोजनकामा या ज्ञेयास्ता वटमातरः