ये त्यजंति महाकाले प्राणान नशनैर्नराः
सांख्याः स्तुवंति ते रुद्रं सर्वदुःखविवर्जिताः अनाशकमृताः शूद्रा महाकालवने नराः
सिंहयुक्तैस्तु ते यांति विमानैरर्कसन्निभैः
नानावर्णसुवर्णाढ्यैर्हृष्टगंधाधिवा सितैः । अनौपम्यगुणै रम्यैरप्सरोगीतवादिभिः
पताकाध्वजविन्यस्तैर्नानाघंटानिनादितैः
रुद्रलोके नरा धीराः सर्वे चानशनैर्मृताः धनी विप्रकुले भोगी जायते मर्त्यमागतः
करीषं साधयेद्यस्तु महाकालवने नरः
रुद्रलोके वसेत्तावद्यावत्कल्पक्षयो भवेत्
तत्र भुक्त्वा महाभोगानिह जातो महीपतिः 5.1.7.
स्वधर्मनिरताश्चैव जितक्रोधा जितेंद्रियाः
रुद्रलोकं व्रजंतीह नात्र चित्रा मतिर्मम
विनापि क्षेत्रवासेन तथैव नियमेन च
मूका जडांधबधि रास्तपोनियमवर्जिताः
कालेनैव मृता व्यास रुद्रलोकं व्रजंति ते
शरीरैर्दिव्यरूपैश्च सर्वभोगसमन्विताः
निर्भत्सिता पुरा देवी कालीति पार्वतीति च
एवं हि कलहो जातः शिवगौर्योर्हि यत्र तु
कृतमग्रे तदा कुंडं नाम्ना कलहनाशनम्
तस्मिंस्तीर्थे नरः स्नात्वा पूजयित्वा महेश्वरम् 5.1.8.
तत्र यच्छति यो दानं त्रुटिमात्रं च चंदनम्
भूमिदानं च यस्तत्र प्रदास्यति नरो मुने
गामेकां रक्ति कामेकां भूमेरप्येकमंगुलम्
धेनुमश्वांस्तिलान्वस्त्रं भाजनं ताम्रदोहनम्
ये प्रदास्यंति विप्रेभ्यस्तेषां लोकाः सदाऽक्षयाः
सा तत्र सर्वलोकानां देवी दुरितहारिणी
तस्मिन्स्नात्वा तु यः पश्येत्पृष्ठमातर आदरात्
तासां तु दर्शनं कृत्वा मार्गे गमनमाचरेत्
स्वदेशे परदेशे वा पर्वतेष्वटवीषु च
ग्रहपीडासु सर्वासु तथा राजभयादिकम् 5.1.8.
देवीमुद्दिश्य यो विप्र सोऽभीष्टफलमश्नुते