निर्ममा निरहंकारा निःसंगा निष्परिग्रहाः
भूतानां कर्मभिर्नित्यं त्रिविधैरभयप्रदाः
यजंतो विवि धैर्यज्ञैर्ये विप्राः क्षेत्रवासिनः
व्रजंत्येव सुदुष्प्राप्यं ब्रह्मसायुज्यमक्षयम्
पुनरावर्तनं हित्वा विधिं माहेश्वरं स्थिताः
गार्हस्थ्यं विधिमासाद्य षट्कर्मनिरताः सदा
अधिकं फलमायांति सर्वदुःखविवर्जिताः
दिव्येनैश्वर्ययोगेन स्वारूढः स्वपरिग्रहः
वृतः स्त्रीणां सहस्रैश्च स्वच्छंदगमनालयः 5.1.7.
स्पृहणीयतमः पुंसां सर्ववर्णोत्तमो धनी
धर्मज्ञो रुद्रभक्तश्च सर्वविद्यार्थपारगः
वेदाध्ययनसंयुक्तो च भैक्षवृत्तिर्जितेंद्रियः
मृतः काले समृद्धेन सर्वभोगावलंबिना
गुह्यकोनाम रुद्रस्य गणः परमसंमतः
तेषां च समतां याति तुल्यैश्वर्यसम न्वितः ।। देवदानवमर्त्येषु स च पूज्यतमो भवेत
वर्षकोटिसहस्राणि वर्षकोटिशतानि च
वसित्वासौ विभूत्या वै यदा च च्यवते नरः
महाकालवने क्षेत्रे ब्रह्मचर्याश्रमे स्थितः
मृतोऽसौ याति दिव्ये वै विमाने सूर्यवर्चसि 5.1.7.
रुद्रलोकं समासाद्य गुह्यकैः सह मोदते
भुक्त्वा युगसहस्राणि रुद्रलोके महीयते
नित्यं प्रमुदितस्तत्र भुक्त्वा लोकमनामयम्
स्पृहणीयवपुः स्त्रीणां महाभोगपतिर्भवेत्
वानप्रस्थसमाचारो वनौषधिविवर्जितः
कणाशनोऽश्मकुट्टो वा दंतोलूखलकोऽथ वा
जटी त्रिषवणस्नायी मुक्तकेशः सुदंडवान्
कीटकंटकपाषाणभूम्यां तु शयनं तथा
अरण्यौषधिभोक्ता च सर्वभूताभयप्रदः
रुद्रभक्तः क्षेत्रवासी महाकालवने मुनिः 5.1.7.
यश्चात्र वसते व्यास शृणु तस्य हि या गतिः