रामस्य सव्यपार्श्वे तु सपद्मा श्रीः समाश्रिता
नानाविधायुधान्यत्र धनुर्ज्याप्रभृतीनि च
वेदो ब्राह्मणरूपेण सावित्री सव्यदक्षिणे
ऋषयश्च महात्मानः सर्वे चैव महीधराः
तथानुयांति काकुत्स्थमंतःपुरगताः स्त्रियः 2.8.6.
सान्तःपुरश्च भरतः शत्रुघ्नसहितो ययौ
ततो विप्रा महात्मानः साग्निहोत्राः समंततः
मंत्रिणो भृत्ययुक्ताश्च सपुत्राः सहबांधवाः
ततः सर्वाः प्रकृतयो हृष्टपुष्टजनावृताः
तथा प्रजाश्च सकलाः सपुत्राश्च सवबांधवाः
स्नाताः शुक्लाम्बरधराः सर्वे प्रयतमानसाः
न कश्चित्तत्र दीनोऽभून्न भीतो नातिदुःखितः
द्रष्टुकामाश्च निर्वाणं राज्ञो जनपदास्तथा
ऋक्षवानररक्षांसि जनाश्च पुरवासिनः
तानि भूतानि नगरे ह्यन्तर्धानगतान्यपि 2.8.6.
यानि पश्यंति काकुत्स्थं स्थावराणि चराणि च
नासीत्सत्त्वमयोध्यायां सुसूक्ष्ममपि किंचन
अथार्द्धयोजनं गत्वा नदीं पश्चान्मुखो ययौ
अथ तस्मिन्मुहूर्ते तु ब्रह्मा लोकपितामहः आययौ तत्र काकुत्स्थं स्वर्गद्वारमुपस्थितम्
विमानशतकोटीभिर्दिव्याभिः सर्वतो वृतः
स्वयंप्रभैश्च तेजोभिर्महद्भिः पुण्यकर्मभिः
सपुण्यपुष्पवर्षं च वायुयुक्तं महाजवम्
शरयूसलिलं रामः पद्भ्यां स समुपास्पृशत्
त्वं हि लोकपतिर्देव न त्वां जानाति कश्चन
त्वमचिंत्यं महद्भूतमक्षयं लोकसंग्रहे 2.8.6.
पितामहस्य वचनादिदमेवाविशत्स्वयम् ततो विष्णुतनुन्देवाः पूजयन्तः सुरोत्तमम्
साध्या मरुद्गणाश्चैव सेन्द्राः साग्निपुरोगमाः सुपर्णा नागयक्षाश्च दैत्यदानवराक्षसाः
देवाः प्रहृष्टा मुदिताः सर्वे पूर्णमनोरथाः
अथ विष्णुर्महातेजाः पितामहमुवाच ह
इमे तु सर्वे मत्स्नेहादायाताः सर्वमानवाः