यतोऽग्निर्व्यास तेनोक्तो गिरौ दुर्गे महामुने
सोऽपि भिन्नः समाहूतो ब्रह्मणा स्थानलिप्सया
तस्मात्त्वं संस्कृतां वाणीं द्विजातीनां प्रकाशय
तस्माद्द्विजातेर्विज्ञेया वाणी पुण्या प्रकाशिता
अनृताक्षरविन्यासादमंगल्या ह्यसंस्कृता 5.1.4.
आहूय भूयोऽकाराग्निं प्रजापतिरचक्षुषम्
ब्रह्माणमाह वह्निस्तु वाचोहं मुखमस्मि हे
ब्रह्मा तमाह यस्मात्त्वं तेजःस्थानं समीहसे
यस्मात्तेजः प्रपश्यंति चक्षुर्भवति दुर्बलम्
इकारमथ संभिन्नमग्निमाह पितामहः
यस्माच्छीघ्रं महासत्त्व सौम्यदृष्टिरिहागतः
संशीतात्मा शीतरश्मिश्चंद्रमास्त्वं भविष्यसि
तरुस्थः सर्वतेजांसि तेजसाऽभिभविष्यसि
इहैहीतीति शिरसि समादाय न्यवेशयत्
स एवं रूपवानग्निरुकाराग्निः प्रतिष्ठितः 5.1.4.
भवाग्निरूपं परमं ब्रह्माणमिदमब्रवीत्
ब्रह्मा तमाह कतमं स्थानं ते रोचतेऽनल
स्थानं नैवास्ति ते भव्यं ततो ह्येवं भविष्यति
लोके नित्यं समाचार लोकसंस्थितिहेतुकः
यदिह त्वं महाज्वालाभाभिः कलितशोभनः न ह्येष धर्मश्चैवाद्यो मायामोहितकाम्यया
इत्युक्ते ब्रह्मणा सोऽग्निः प्रजज्वाल सहस्रशः
अकारेकार ऊकारो ब्रह्मा तमथ दृष्टवान्
व्याप्तं भवाग्निना सर्वं तिर्यगूर्ध्वमधस्तथा
चिंतयंतं तु ब्रह्माणं भीतं चैव विशेषतः
तेजोनिधिं च सर्वेशं ज्ञातुमिच्छन्प्रजापतिः 5.1.4.
अद्भुतानां प्रतिश्रोत्रे तेजसा निधये नमः
बीजं यो विश्वभावानां संमोहनविमोहनम्
ऊर्ध्ववक्त्र नमस्तेस्तु सत्त्वात्मक धरात्मक
जलजोत्फुल्लपत्राक्ष जलदेव हुताशन
यज्ञाहुतिसमाचार यज्ञरूप नमोनमः