ततो मनःप्रकामेशं प्रीतिकेशमथो व्रजेत्
यात्रैकादशलिंगानामेषा कार्या प्रयत्नतः
अतः परं प्रवक्ष्यामि गारी यात्रामनुत्तमाम्
गोप्रेक्षतीर्थे सुस्नाय मुखनिर्मालिकां व्रजेत्
सौभाग्यगौरी संपूज्या ज्ञानवाप्यां कृतोदकैः
स्नात्वा विशालगंगायां विशालाक्षीं ततो व्रजेत् 4.2.100.
स्नात्वा भवानीतीर्थेथ भवानीं परिपूजयेत्
ततो गच्छेन्महालक्ष्मीं स्थिरलक्ष्मीसमृद्धये
न दुःखैरभिभूयेत इहामुत्रापि कुत्रचित्
ब्राह्मणेभ्यस्तदुद्देशाद्देया वै मोदका मुदे
रविवारे रवेर्यात्रा षष्ठ्यां वारविसंयुजि
नवम्यामथवाष्टम्यां चंडीयात्रा शुभा मता
प्रातःस्नानं विधायादौ नत्वा पंचविनायकान्
अंतर्गृहस्य यात्रा वै करिष्ये घौघशांतये
स्नात्वा मौनेन चागत्य मणिकर्णीशमर्चयेत्
पर्वतेशं ततो दृष्ट्वा गंगाकेशवमप्यथ 4.2.100.
ततो वै सोमनाथं च वाराहं च ततो व्रजेत्
कश्यपेशं नमस्कृत्य हरिकेशवनं ततः
गोकर्णेश्वरमभ्यर्च्य हाटकेशमथो व्रजेत्
भारभूतं ततो नत्वा चित्रेगुप्तेश्वरं ततः
पितामहेश्वरं गत्वा ततस्तु कलशेश्वरम्
नागेश्वरो हरिश्चंद्रश्चिंतामणिविनायकः
वसिष्ठवामदेवौ च मूर्तिरूपधरावुभौ
सीमाविनायकं चाथ करुणेशं ततो व्रजेत् आशाविनायकश्चाथ वृद्धादित्यस्ततः पुनः
चतुर्वक्त्रेश्वरं लिंगं ब्राह्मीशस्तु ततः परः
चंडीचंडीश्वरौ दृश्यौ भवानीशंकरौ ततः 4.2.100.
लांगलीशस्ततोभ्यर्च्यस्ततस्तु नकुलीश्वरः
प्रतिग्रहेश्वरं वापि निष्कलंकेशमेव च
गंगेशोर्च्यस्ततो ज्ञानवाप्यां स्नानं समाचरेत्
दंडपाणिं महेशं च मोक्षेशं प्रणमेत्ततः