ते पूज्यास्ते नमस्कार्यास्ते संतोष्याः प्रयत्नतः
काश्यां वसंति ये मर्त्या दूरस्थैरपि सन्नरैः
प्रसरस्त्विंद्रियाणां च निवार्योत्र निवासिभिः
मरणं नाभिकांक्षेद्धि कांक्ष्यो मोक्षोऽपिनो पुनः
शरीरसौष्ठवं कांक्ष्यं व्रतस्नानादिसिद्धये
आत्मरक्षात्र कर्तव्या महाश्रेयोभिवृद्धये
एकस्मिन्नपि यच्चाह्नि काश्यां श्रेयोभिलभ्यते
अन्यत्र योगाभ्यसनाद्यावज्जन्म यदर्ज्यते
सर्वतीर्थावगाहाच्च यावज्जन्म यदर्ज्यते
सर्वलिंगार्चनात्पुण्यं यावज्जन्म यदर्ज्यते 4.2.96.
तत्फलं सम्यगाप्येत विश्वेश्वर विलोकनात्
यत्षोडशमहादानैः पुण्यं प्रोक्तं महर्षिभिः
अश्वमेधादिभिर्यज्ञैर्यत्फलं प्राप्यतेखिलैः
महापूजोपकरणं योर्पयेद्विश्वभर्तरि
सर्वर्तुकुसुमाढ्यां च यः कुर्यात्पुष्पवाटिकाम्
यः क्षीरस्नपनार्थं वै विश्वेशे धेनुमर्पयेत्
विश्वेशराजसदने यः सुधां चित्रमेव वा 4.2.96.
ब्राह्मणान्यतिनो वापि तथैव शिवयोगिनः
कोटिभोज्यफलं तस्य श्रद्धया नात्र संशयः
विश्वेशस्तोषणीयोत्र स्नानहोमजपादिभिः अष्टोत्तरशतं जप्त्वा तदत्र समवाप्यते
कोटिहोमेन यत्प्रोक्तं फलमन्यत्र सूरिभिः
यो जपेद्रुद्रसूक्तानि काश्यां विश्वेशसन्निधौ
तस्य पुण्यं न जानामि चिंतिते चाक्षरे परे
आपद्यपि हि घोरायां काशी त्याज्या न कुत्रचित्
अवंध्यं दिवसं कुर्यात्स्नानदानजपादिभिः
कृच्छ्रचांद्रायणादीनि कर्तव्यानि प्रयत्नतः
यदींद्रियाणि कुर्वंति विक्रियामिह देहिनाम् 4.2.96.
तेषां स्वरूपमाख्याहि स्कंदेंद्रिय विशुद्धये
यानि कृत्वात्र मनुजो देहशुद्धिं लभेत्पराम्
एकभक्तेन नक्तेन तथैवायाचितेन च