चेष्टास्त्यज दरिद्राणां धूलिधूसरिणाममूः
तां दशां चरमां प्राप्य भक्तियोगं ततश्चर
रुष्टदृष्टिं च जनकं कदाचिदवलोक्य सः 4.1.32.
ततश्चिंतामवापोच्चैर्दिग्भ्रांतिमपि चाप्तवान्
क्व यामि क्व स्थिते शंभो मम श्रेयो भविष्यति
इति श्रुतं मया पूर्वं पितुरुत्संगवर्तिना
मात्रा पित्रा परित्यक्ता ये त्यक्ता निजबंधुभिः
जरया परिभूता ये ये व्याधिविकलीकृताः
पदे पदे समाक्रांता ये विपद्भिरहर्निशम्
पापराशिभिराक्रांता ये दारिद्र्य पराजिताः
संसार भयभीताय ये ये बद्धाः कर्मबंधनैः
श्रुतिस्मृतिविहीना ये शौचाचारविवर्जिताः
ये च योगपरिभ्रष्टास्तपो दान विवर्जिताः 4.1.32.
मध्ये बंधुजने येषामपमानं पदे पदे
आनंदकानने येषां रुचिर्वै वसतां सताम्
भर्ज्यते कर्मबीजानि यत्र विश्वेशवह्निना
हरिकेशो विचार्येति यातो वाराणसीं पुरीम्
पुनर्नो तनुसंबंधस्तनुद्वेषिप्रसादतः
अथ कालांतरे शंभुः प्रविश्यानंदकानमम्
अमंदामोदमंदारं कोविदारपरिष्कृतम्
विकसन्मालतीजालं करवीरविराजितम्
जृंभद्विचकिलामोदं लसत्कंकेलिपल्लवम्
पुष्प्यपुन्नागनिकरं बकुलामोदमोदितम् 4.1.32.
बहुशोलंबिरोलंब मालामालितभूतलम्
गुरुणाऽगुरुणामत्त भद्रजातिविहंगमम्
मेरुतुंग नमेरुस्थच्छायाक्रीडितकिंनरम्
कदंबानां कदंबेषु गुंजद्रोलंबयुग्मकम्
शालतालतमालाली हिंताली लकुचावृतम् नारिकेल तरुच्छन्न नारंगीरागरंजितम्
फलिजंबीरनिकरं मधूकमधुपाकुलम्
मधुरामोद दमनच्छन्नं मरुबनोदितम्