इति ते कथिता विप्र लोकानां च परिस्थितिः
इदं तु परमाख्यानं शृणुयाद्यः समाहितः
यज्ञोत्सवे विवाहे च मंगलेष्वखिलेष्वपि
सर्वाधिकारदानेषु नववेश्मप्रवेशने 4.1.23.
अपुत्रो लभते पुत्रमधनो धनवान्भवेत्
जप्यमेतत्प्रयत्नेन सततं मंगलार्थिना
गणावूचतुः शिवशर्मन्नुदर्कं ते कथयावो निशामय
ब्रह्मणो वत्सरं पूर्णं रममाणोऽप्सरोगणैः
भविष्यसि महीपालो नगरे नंदिवर्धने
कृष्टिभिर्हृष्टपुष्टैश्च रम्यहाटकभूषणैः
सदासंपन्नसस्यं च सूर्वरक्षेत्रसंकुलम्
देवतायतनानां च राजिभिः परिराजितम्
सुपुष्प कृत्रिमोद्यानाः ससदाफलपादपाः
सदंभा निम्नगाराजिर्न यत्र जनता क्वचित्
विभ्रमो यत्र नारीषु नविद्वत्सु च कर्हिचित्
तमोयुक्ताः क्षपा यत्र बहुलेषु न मानवाः 4.1.24.
धनैरनंधो यत्रास्ति मनो नैव च भोजनम्
दंडः परशुकुद्दाल वालव्य जनराजिषु
अन्यत्राक्षिकवृंदेभ्यः क्वचिन्न परिदेवनम्
जाड्यवार्ता जलेष्वेव स्त्रीमध्या एव दुर्बलाः
औषधेष्वेव यत्रास्ति कुष्ठयोगो न मानवे
कंपःसात्त्विकभावोत्थो न भयात्क्वापि कस्यचित्
दुर्लभत्वं सदा कस्य सुकृतेन च वस्तुनः
दानहानिर्गजेष्वेव द्रुमेष्वेव हि कंटकाः
बाणेषु गुणविश्लेषो बंधोक्तिः पुस्तके दृढा
दंडवार्ता सदा यत्र कृतसंन्यासकर्मणाम् 4.1.24.
यत्र क्षपणका एव दृश्यंते मलधारिणः
इत्यादि गुणवद्देशे त्वयिराज्यं प्रशासति
सौभाग्यभाजि रूपाढ्ये शौर्यौदार्यगुणान्विते
राज्ञीनामयुतंभावि कुमाराणां शतत्रयम्