प्रद्युम्नाय नमस्तुभ्यमनिरुद्धाय ते नमः 4.1.21.
दामोदरहृषीकेश गोर्विदाच्युतमाधव
नारायणाय नरकहारिणे पापहारिणे
अनंताय नमस्तुभ्यमनंतशयनाय च
चैद्यहंत्रे नमस्तुभ्यं दानवारेसुरारये
नमस्ते पुंडरीकाक्ष दनुजेंद्र निषूदिने
गोपीप्रियाय केशिघ्ने गोवर्धनधराय च
रावणारे नमस्तुभ्यं विभीषणशरण्यद
क्षणादि कालरूपाय नानारूपाय शार्ङ्गिणे
बलाय बलभद्राय बलारातिप्रियाय च
हिरण्यकशिपोर्वक्षो विदारण रणप्रिय 4.1.21.
नमस्ते धर्मरूपाय नमः सत्त्वगुणाय च
सहस्राक्ष सहस्रांघ्रे सहस्रकिरणाय च
वेदवेद्यस्वरूपाय नमो वेदप्रियाय च
वैकुंठाय नमस्तुभ्यं नमो वैकुंठवासिने
विष्वक्सेन नमस्तुभ्यं जगन्मय जनार्दन
केशवाय नमस्तुभ्यं मायिने ब्रह्मागायिने
स्तुत्याय स्तुतिरूपाय भक्तस्तुतिरताय च
अंडजाय नमस्तुभ्यं स्वेदजाय नमोस्तु ते
देवानामिंद्ररूपोसि ग्रहाणामसि भानुमान्
सुरापगाऽसि सरितां सरसां मानसं सरः 4.1.21.
धातूनां हाटकमसि स्फटिकश्चोपलेष्वसि
सर्वपूज्यशिलानां वै शालग्राम शिला भवान्
वर्णेषु श्वेतवर्णोऽसि द्विपदां ब्राह्मणो भवान्
वेदेषूपनिषद्रूपा मंत्राणां प्रणवोह्यसि
प्रतापिनामग्निरसि क्षमाऽसि त्वं क्षमावताम्
चापोसि सर्वशस्त्राणां वातो वेगवतामसि
व्योमव्याप्तिमतां त्वं वै परमात्माऽसि चात्मनाम्
क्रतूनामश्वमेधोसि दानानामभयं भवान्
युगानां प्रथमोसि त्वं तिथीनां त्वं कुहूर्ह्यसि