गुहस्ततो वचः प्राह धर्मदेवसमागमे
ब्रवीतु कोऽपि सर्वेषां तीर्थानां तेषु वर्तताम् 1.2.58.
तिष्ठत्वात्मगुणो यच्च तीर्थराजेन वर्णितः
अहो न युक्तं पालानां यदि तेऽप्यविमृश्य च
एवमुक्ते गुहेनाथ धर्मो वचनमब्रवीत्
मुख्यत्वं सर्वतीर्थानामर्घं चापि पितामहात् परोक्षेपि स्वप्रशंसा ब्रह्माणमपि चालयेत्
स्वप्रशंसां प्रकुर्वाणः पराक्षेपसमन्विताम् यानि पूर्वं प्रमाणानि कृतानीशेन धीमता
तानि सम्पालनीयानि तानि कोऽति क्रमेद्बुधः
पालयामास एतच्च त्वं पालयितुमर्हसि
तदस्माभिरिदं युक्तं शासनं दिश्यतां परम्
अहं प्रस्तावमन्वीक्ष्य वाक्यमेतदुदैरयम्
ब्रह्मविष्णुशिवैर्नित्यं पूजितायाघनाशिने 1.2.58.
तदस्माकं कुतो भावो मा विश्वं नाशय प्रभो
शिववन्माननीयो हि यतः साक्षाच्छिवात्मजः
युवयोरैक्यभावेन सुखं जीवेदिदं जगत्
अनुग्रहश्च क्रियतां तीर्थराजस्य मानद
एवमुच्चरमाणं मां प्रशस्याहापि पद्मभूः
सम्मानय गुहं चापि गुहः स्वामी यतो हि नः
नमो गुहाय सिद्धाय किंकरायस्य ते वयम्
स्तंभादेतन्महातीर्थमप्रसिद्धं भविष्यति
स्तम्भतीर्थमिति ख्यातं सर्वतीर्थफलप्रदम्
यथोक्तं च फलं तस्य स्फुटं सर्वं भविष्यति 1.2.58.
महीसागरयात्रायां भवेत्तच्चावधारय
अष्टाभिश्च प्रयागस्य तत्फलं प्रभविष्यति
अर्बुदस्य च यत्षड्भिस्तत्फलं च भविष्यति
कूपोदर्याश्चतुर्भिश्च तत्फलं प्रभविष्यति
तत्फलं स्तंभतीर्थे वै शनिदर्शे भविष्यति
ब्रह्मापि स्तंभतीर्थाय ददावर्घं समाहितः
तीर्थानि च गुहं नाथं सम्मान्य विससर्ज सः
भूयश्चापि प्रसिद्ध्यर्थं प्रेषिताप्सरसोऽत्र मे