व्यानो हृदि स्थितो नित्यं तथा देहचरोपि च
पाचको रजकश्चैव साधकालोचकौ तथा
पाचकस्तु पचत्यन्नं नित्यं पक्वाशये स्थित.
साधको हृदिसंस्थश्च बुद्ध्याद्युत्साहकारकः
त्वक्संस्थो भ्राजको देहं भ्राजयेन्निर्मलीकृतः
आलंबकस्तथा देहे पंचधा सोम उच्यते
बोधको रसनास्थश्च रसानामवबोधकः
सर्वसंधिगतश्चैव श्लेष्मणः श्लेष्मकृत्तथा 1.2.50.
एवं वाय्वग्निसोमैश्च देहः संधारितस्त्वसौ
पार्थिवानीह जानीहि घ्राणकेशनखानि च
नाभिर्मेदो यकृन्मज्जा अंत्रमामाशयः शिरा
नेत्रयोर्मडलं शुक्लं कफाद्भवति पैतृकम्
पक्ष्ममण्डलमेकं तु द्वितीयं चर्ममण्डलम्
दृङ्मण्डलं पंचमं तु नेत्रं स्यात्पंचमण्डलम्
उपांगो नेत्रपर्यंतो नासा मूलमपांगकः
असृङ्मांसमयी जिह्वा सर्वेषामेव देहिनाम्
एवमत्र स्थिते जीवो देहेऽस्मिन्सप्तसप्तके
त्वगसृग्मांसमित्याहुस्त्रिकं मातृसमुद्भवम् 1.2.50.
एवं भूतमयं देहं पंचभूतसमुद्भवैः
तदन्नं पिण्डकवलैर्ग्रासैर्भुक्तं च देहिभिः
संप्रविश्यान्नमध्ये तु पृथगन्नपृथग्जलम्
जलस्याधः स्वयं प्राणः स्थित्वाग्निं धमते शनैः
तदन्नमुष्णतोयेन समंतात्पच्यते पुनः
मलैर्द्वादशभिः किट्टं भिन्नं देहाद्बहिर्व्रजेत्
रोमकूपाणि चैव स्युर्द्वादशैते मलाश्रयाः
तासां मुखेषु तं सूक्ष्मं व्यानः स्थापयते रसम्
ततः प्रयांति संपूर्णास्ताश्च देहं समंततः
पच्यते पच्यमानस्तु रुधिरत्वं भजेत्पुनः 1.2.50.
नखा मज्जा खवैमल्यं शुक्रवृद्धिः क्रमाद्भवेत्
एवमेतद्विनिष्पन्नं शरीरं पुण्यहेतवे