ययाविष्टः समुज्जह्रे वेदान्कूर्मो जगद्गुरुः
कोटिशो वेदमार्गस्य ध्वंसकान्पापकर्मिणः
कोटिसंख्याभिरत्युग्रदेवीभिः संवृता च सा
पश्चिमायां तथा देवी संस्थिता भास्करा शुभा
बिंबानि सर्वताराणां गच्छन्त्यायांति च द्रुतम्
मयाराध्य समानीता कटाहादत्र संस्थिता
उत्तरस्यां तथा देवी संस्थिता योगनंदिनी
दृष्ट्या दृष्टा निर्मलया योगमापुश्चतुःसनाः 1.2.47.
सैव चांडकटाहान्मे समाराध्यात्र प्रापिता
एवमेता महाशक्त्यश्चतस्रः संस्थिताः सदा
ततश्च नव मे दुर्गाः समानीताः शृणुध्व ताः
त्रिपुरानाम परमा देवी स्थाणुर्यया पुरा
त्रिपुरेति ततस्तां तु प्रोक्तवान्भगवान्हरः
सा चाराध्य समानीता मयामरेश्वरपर्वतात्
अपरा चापि कोलंबा महाशक्तिः सनातनी
तस्मात्सा विष्णुना चोक्ता कोलंबेति स्तुतार्चिता
वाराहगिरिसंस्था मां समानीता च साब्रवीत्
तत्र कूपेन संस्थेयं रुद्राणीसंस्थितेन वै 1.2.47.
तस्माद्भवान्कूपवरं स्वयमत्र खन द्विज
कूपोऽखनि यत्र साक्षाद्रुद्राणी कूप आबभौ
पूजिता च ततो दैवी कोलंबा जगदीश्वरी
सदात्र चाहं स्थास्यामि प्रसादं प्रापिता त्वया
पूजयिष्यंति मां मर्त्यास्तेषां छेत्स्यामि दुष्कृतम्
मेरोः समीपे रुद्राण्याः कूप एष स एव च
प्रयागादपि गंगाया गयायाश्च विशेषतः
तदहं तव वाक्येन संस्थितात्र तपोधन
कुमारेशं पूजयित्वा पूजयिष्यंति ये च माम्
प्रत्यब्रवं प्रमुदितः कोलंबां विश्वमातरम् ।। 1.2.47.
अत्रास्य माता त्वं देवि गुप्तक्षेत्रस्यकारणम्
इदं च यत्सरः पुण्यं त्वन्नाम्ना ख्यातिमेष्यति