कृष्णवेणीतटे केचित्तुंगभद्रांतिके परे 1.3.2.2.
कावेरीतीर इतरे केचिद्वेगवतीतटे
केचिदैरावतीतीरे त्वितरे यातुकांक्षिके
कन्यातटेषु कतिचित्कतिचित्कुमारीतीरे परे च तमसावरुणांतिकेन्ये
विपाशाभ्याश इतरे शतद्रुतितटे परे
केचिद्बिंदुसरोभ्यर्णे परे पंपासरस्तटे
अपरे मालिनीतीरे परे गंधवतीतटे
इंद्रद्युम्नसरस्यन्य एके तु मणिकर्णिके पातालगंगासविधे शरावत्यंतिके परे
लोहित्याकूलयोः केचित्कतिचित्कालमातटे
सुरलोपांतिके केचित्पयोष्णीतीरयोः परे
उक्तं वाराणसीक्षेत्रं क्रोशपंचकपावनम् 1.3.2.2.
कपालमोचनं यत्र यत्रास्ते कालभैरवः
गयाप्रयागावपि ते कथितौ सर्वसिद्धिदौ
आकर्णितं च केदारं यस्मिन्महिषरूपधृक्
सर्वसिद्धिकरं पुंसां क्षेत्रं बदरिकाश्रमम्
श्रुतं हि नैमिषं क्षेत्रं त्वया यत्र महेश्वरः
अमरेशमिति स्थानं प्रोक्तं सर्वार्थसाधकम्
पुष्कराख्यं महास्थानं श्रुतं ते कथितं मया
आषाढीनाम ते स्थानं पावनं कथितं मया
दंडिमुंडी समाख्यं च स्थानं ते कथितं मया
लाकुलंनाम ते स्थानं संशुद्धं कथितं मया 1.3.2.2.
भारभूतिरिति स्थानं भवतोऽभिहितं मया
अरालकेश्वरं नाम स्थानं ते कथितं मया
गयानाम महाक्षेत्रं तव प्रस्तावितं मया
कुरुक्षेत्रमिति स्थानं भवते विनिवेदितम्
उक्तं कनखलंनाम मया ते स्थानमुत्तमम्
तालकाख्यं महाक्षेत्रं मार्कंडेय मयोदितम्
अट्टहासमिति प्रोक्तं महास्थानं मया तव
कृत्तिवासाभिधं क्षेत्रमुक्तं ते वेदवित्तम
भ्रमरांबिकया देव्या महेशो मल्लिकार्जुनः