इतीरयित्वा स मृकंडुनंदनः समं मुनींद्रैरपरैर्महात्मभिः
नंदिकेश्वर उवाच स्थानं त्वया मुने पृष्टमस्ति माहेश्वराग्रणि
प्रकल्पितं हि देवेन तत्तत्कर्मानुगुण्यतः
त्वया शुश्रुषितं तेषां हिताय महते ह्यलम्
स्वल्पैर्हि कर्मभिर्ज्ञानैरपि प्राप्ता पुनःपुनः
कथं नु विरतो देही गर्भमोकसमागमात्
प्रदेशाः कथिताः पूर्वं प्रसंगवशतो मया
केचित्तीरेषु गंगायाः केचित्सारस्वते तटे
अपरे नर्मदातीरे परे गोदावरीतटे
समुद्रपार्श्वेष्वितरं द्वीपेष्वन्ये सरस्वताम्
कृष्णवेणीतटे केचित्तुंगभद्रांतिके परे 1.3.2.2.
कावेरीतीर इतरे केचिद्वेगवतीतटे
केचिदैरावतीतीरे त्वितरे यातुकांक्षिके
कन्यातटेषु कतिचित्कतिचित्कुमारीतीरे परे च तमसावरुणांतिकेन्ये
विपाशाभ्याश इतरे शतद्रुतितटे परे
केचिद्बिंदुसरोभ्यर्णे परे पंपासरस्तटे
अपरे मालिनीतीरे परे गंधवतीतटे
इंद्रद्युम्नसरस्यन्य एके तु मणिकर्णिके पातालगंगासविधे शरावत्यंतिके परे
लोहित्याकूलयोः केचित्कतिचित्कालमातटे
सुरलोपांतिके केचित्पयोष्णीतीरयोः परे
उक्तं वाराणसीक्षेत्रं क्रोशपंचकपावनम् 1.3.2.2.
कपालमोचनं यत्र यत्रास्ते कालभैरवः
गयाप्रयागावपि ते कथितौ सर्वसिद्धिदौ
आकर्णितं च केदारं यस्मिन्महिषरूपधृक्
सर्वसिद्धिकरं पुंसां क्षेत्रं बदरिकाश्रमम्
श्रुतं हि नैमिषं क्षेत्रं त्वया यत्र महेश्वरः
अमरेशमिति स्थानं प्रोक्तं सर्वार्थसाधकम्
पुष्कराख्यं महास्थानं श्रुतं ते कथितं मया
आषाढीनाम ते स्थानं पावनं कथितं मया
दंडिमुंडी समाख्यं च स्थानं ते कथितं मया