पिबामि चार्णवान्सप्ताप्येकेन चुलुकेन वै
त्वदाज्ञया नयामीश विनिमय्य स्वहेलया
अपि वैकुंठनाथश्चेत्तत्साहाय्यं करिष्यति
दनुजा दितिजाः के वै वरा कारणदुर्बलाः
कालं बध्नामि वा संख्ये मृत्योर्वा मृत्युमर्थये
त्वद्बलेन महेशान न कोपि स्थैर्यमेष्यति
कदलीदलवद्वाताद्वेपते सरसातलम्
किं बहूक्तेन देह्याज्ञां ममासाध्यं न किंचन
इति प्रतिज्ञां तस्येशः श्रुत्वा कृतममन्यत
महावीरोसि रे भद्र मम सर्वगणेष्विह 4.2.89.
कुरु मे सत्वरं कार्यं दक्षयज्ञं क्षयं नय
ते त्वयाप्यवमंतव्या व्रज पुत्र शुभोदय
हरं प्रदक्षिणीकृत्य जग्मिवानतिरंहसा
शतकोटिमितानुग्रान्गणानन्न्यानवासृजत्
केचित्तदनुगा जाताः केचित्तत्पार्श्वगा ययुः
शृंगाग्राणि गिरीणां च कैश्चिदुत्पाटितानि वै
उत्पाट्य महतो वृक्षान्केचित्प्राप्ता मखांगणम्
मंडपं ध्वंसयामासुः केचित्क्रोधोद्धुरागणाः अभक्षयन्हवींष्यन्ये पृषदाज्यं पपुः परे
दध्वंसुरन्नराशींश्च केचित्पर्वतसन्निभान्
केचित्पक्वान्नपुष्टांगा यज्ञपात्राण्यचूर्णयन् 4.2.89.४० व्यभजञ्छकटान्केचित्पशून्केचिदजीगिलन्
स्वयं परिदधुश्चान्ये दुकूलानि मुदा युताः
एकेन च भगो देवः पश्यंश्चक्रे विलोचनः
यज्ञः पलायितो दृष्टः केनचिन्मृगरूपधृक्
एकः सरस्वतीं यांतीं दृष्ट्वा निर्नासिकां व्यधात्
अर्यम्णो बाहुयुगलं तथोत्पाटितवान्परः
चिच्छेद वायोर्वृषणं पार्षदोन्यः प्रतापवान्
यत्र धर्मे महेशो न प्रथमं परिपूज्यते
अनीश्वरं हविर्भुक्तं त्वयेत्या ताडयत्पदा
वामयामास बहुशो भक्षिता ह्यध्वराहुतीः 4.2.89.
रुद्राख्या धारणवशात्प्रमथैस्तेऽवहेलिताः