अथ तेषूपविष्टेषु शंभुना विष्टरश्रवाः
श्रीवत्सलांछन हरे दैत्यवंशदवानल
दितिजान्दनुजान्दुष्टान्कच्चिच्छासि रणांगणे
बाधया रहिता गावः कच्चित्संति महीतले
विधियज्ञाः प्रवर्तंते पृथिव्यां बहुदक्षिणाः
निष्प्रत्यूहं पठंत्येव सांगान्वेदान्द्विजोत्तमाः
स्वेषु स्वेषु च धर्मेषु कच्चिद्वर्णाश्रमास्तथा
धूर्जटिः परिपृछ्येति हृष्टं वैकुंठनायकम्। ब्रह्माणं चापि पप्रच्छ ब्राह्मं तेजः समेधते ।। 4.2.87.
सत्यमस्खलितं कच्चिदस्ति त्रैलोक्यमंडपे
इंद्रादयः सुराः कच्चित्स्वेषु स्वेषु पुरेष्वहो
प्रत्येकं परिपृच्छयेशः सर्वानित्थं कृतादरान्
विससर्जाथ तान्सर्वान्देवः सौधं समाविशत्
मध्ये मार्गं स चिंतोभूद्दक्षः सत्याः पिता तदा
अतीव क्षुब्धचित्तोभून्मंदराघाततोऽब्धिवत्
अतीवगर्वितो जातः सती मे प्राप्य कन्यकाम्
किं वंश्यस्त्वेष किं गोत्रः किं देशीयः किमात्मकः
न प्रायशस्तपस्व्येष क्व तपः क्वास्त्रधारणम्
असौ न ब्रह्मचारी स्यात्कृतपाणिग्रह स्थितिः 4.2.87.
न ब्राह्मणोभवत्येष यतो वेदो न वेत्त्यमुम्
क्षतात्संत्राणनात्क्षत्रं तत्क्वास्मिन्प्रलयप्रिये
शूद्रोपि न भवेत्प्रायो नागयज्ञोपवीतवान्
सर्वः प्रकृत्या ज्ञायेत स्थाणुः प्रकृतिवर्जितः
योषापि न भवेदेष यतोसौ श्मश्रुलाननः
बालोपि न भवत्येष यतोऽयं बहुवार्षिकः
अतो युवत्वं संभाव्यं नात्र नूनं चिरंतने
ब्रह्मादीन्संहरेत्प्रांते तथापि च न पातकी
अहो धार्ष्ट्यं महद्दृष्टं जटिलस्याद्य चाद्भुतम् 4.2.87.
एवंभूता भवंत्येव मातापितृविवर्जिताः
स्वच्छंदचारिणोऽनाथाः सर्वत्र स्वाभिमानिनः
जामातॄणां स्वभावोयं प्रायशो गर्वभाजनम्