सर्वभूषणसंयुक्ता शृङ्गाररसवर्द्धनी
मदंतिकमलंकुर्वन्भक्ष्यैर्भोज्यैर्बहूदयैः
उत्सवार्था परा शक्तिरंतिकस्थैव पूज्यताम्
उत्सवार्थं समभ्यर्च्यश्चक्षुरग्रेऽमृतेश्वरः 1.3.1.8.
द्वारे नन्दी महाकालः पुरस्तात्सूर्यसंनिभः
दक्षिणे मातरः पूज्या विघ्नशास्तृसमन्विताः
स्कन्दः शक्तिधरश्चैवैशानकोणे समर्च्यताम्
मंदिरं मम संपूज्य दक्षिणामूर्ति दक्षिणम्
उत्तरे ब्रह्मरूपांकं पूर्वे सारंगभूयुतम्
अपीतकुचनाथायाः सर्वशक्तिसमन्वितम्
मंदिरस्यावनार्थाय देवीर्वैभवनायकाः
क्षेत्रपालं तु संपूज्य सर्वावरणसंयुतम्
काली बहुविधाश्चान्या देवता विधिपालकाः
सृजस्व कन्यका दिव्याः शिवदेवार्हणे रताः ।। 1.3.1.8.
चारुविभ्रमसंयुक्ताः कामदा नित्यपावनाः
दिव्योपचारसंसिद्ध्यै सुभगाञ्छुद्धचेतसः
शैवाचारप्रसिद्ध्यर्थमादिशाभ्यर्चने मम
शौल्बिकान्सृज सद्विद्यांश्चतुर्विद्याविशारदान्
चत्वारश्च मठाः कल्प्याश्चतुर्दिक्तीर्थवासिनाम्
तेषु स्थिता मुनींद्रा मे रक्षंतु शिवपूजनम्
पालयंतु सदान्ये च युक्ताः कापालिका अपि
अव्याहताज्ञमारक्ष्यमिदं स्थानं महीभृताम्
अत्र भक्ता वितन्वन्तु शिवकार्यविनिश्चयम्
यत्तदक्षय्यफलदमारक्ष्यं शिवसेवकैः 1.3.1.8.
सर्वं संपादयिष्यामि तेषां चित्तानुकूलकम्
आगमोक्ता च पूजेयं मानुषी निर्मिता यतः
संकल्पितं भवेत्कर्म प्रीतिकृन्मम सेवकैः
विधायाभ्यर्चनाभेदाँल्लोकरक्षाकृते मुने
सत्राणि विविधान्यत्र कर्तव्यानि सहस्रशः
अव्युच्छिन्नप्रदीपस्य दातारो मम सन्निधौ