अथ नंदी समादाय सत्वरं मुनिपुंगवम्
जैगीषव्योथ संभ्रांतः पुरतो वीक्ष्य शंकरम् 4.2.63.
प्रणम्य दंडवद्भूमौ परिलुठ्य समंततः
जगदानंदकंदाय परमानंदहेतवे
अरूपाय सरूपाय नानारूपधराय च
स्थावराय नमस्तुभ्यं जंगमाय नमोस्तुते
नमस्त्रैलोक्यकाम्याय कामांगदहनाय च
श्रीकंठाय नमस्तुभ्यं विषकंठाय ते नमः
नमः शक्त्यर्धदेहाय विदेहाय सुदेहिने
कालाय कालकालाय कालकूट विषादिने
नमस्ते खंडपरशो नमः खंडें दुधारिणे
गीर्वाणगीतनाथाय गंगाकल्लोलमालिने ।। 4.2.63.
चंद्रार्धशुद्धभूषाय चंद्रसूर्याग्निचक्षुषे
जगदीशाय जीर्णाय जराजन्महराय ते
नमो डमरुहस्ताय धनुर्हस्ताय ते नमः
त्रिशूलव्यग्रहस्ताय नमस्त्रिपथगाधर
त्रयीमयाय तुष्टाय भक्ततुष्टिप्रदाय च
दारिताशेषपापाय नमस्ते दीर्घदर्शिने
दोषाकर कलाधार त्यक्तदोषागमाय च
नमो धीराय धर्माय धर्मपालाय ते नमः
नाममात्रस्मृतिकृतां त्रैलोक्यैश्वर्यपूरक
पशुपाशविमोक्षाय पशूनां पतये नमः 4.2.63.
परात्पराय पाराय परापरपराय च
वामदेवाय वामार्धधारिणे वृषगामिने
भवाय भवनाशाय भूतानांपतये नमः
नमो मृडानीपतये नमो मृत्युंजयाय ते
यायजूकाय यज्ञाय यज्ञानां फलदायिने
शूलिने शाश्वतेशाय श्मशानावनिचारिणे
हराय क्षांतिरूपाय क्षेत्रज्ञाय क्षमाकर
अंधकारे नमस्तुभ्यमाद्यंतरहिताय च