नैगमेयेन सहितो रुद्रैः सर्वत्र संवृतः
समस्तायतनाधीशैर्दिक्पालैरभिनंदितः
कृतपूजोप्सरोभिश्च नृत्यहस्तकपल्लवैः
ऋषीणां ब्रह्मनिर्घोषैर्बधिरीकृतदिङ्मुखः
त्रिविष्टप वधूमुष्टिभ्रष्टैर्लाजैरितस्ततः
दत्तमाल्योपहारश्च बहुविद्याधरी गणैः
कृतप्रवेश शकुनो मृगैः शकुनिभिः पुरः
विष्णुना च महालक्ष्म्या ब्रह्मणा विश्वकर्मणा
नागांगनाभिः परितः कृतनीराजनाविधिः 4.2.57.
पश्यतां सर्वदेवानामवरुह्य वृषेंद्रतः
यदहं प्राप्तवानस्मि पुरीं वाराणसीं शुभाम्
यद्दुष्प्रसाध्यं हि पितुरपि त्रिजगतीतले
अनेन गजवक्त्रेण स्वबुद्धिविभवेरिह
पुत्रवानहमेवास्मि यच्च मे चिरचिंतितम्
इत्युक्त्वा त्रिपुरीहर्ता पुरुहूतादिभिः स्तुतः
अविघ्नविघ्नशमन महाविघ्नैकविघ्नकृत्
जय सर्वगणाधीश जय सर्व गणाग्रणीः
जय सर्वग सर्वेश सर्वबुद्ध्येकशेवधे
सर्वमंगलमांगल्य जय त्वं सर्वमंगल 4.2.57.
जय सृष्टिकृतां वंद्य जय स्थितिकृतानत
सिद्धवंद्यपदांभोज जयसिद्धिविधायक
अशेषगुणनिर्माण गुणातीत गुणाग्रणी
जय सर्वबलाधीश बलाराति बलप्रद
अनंतमहिमाधार धराधर विदारण
ये त्वांनमंति करुणामय दिव्य मूर्ते सर्वैनसामपि भुवो भुविमुक्तिभाजः
ये विघ्नराज भवता करुणाकटाक्षैः संप्रेक्षिताः क्षितितले क्षणमात्रमत्र
ये त्वां स्तुवंति नतविघ्नविघातदक्ष दाक्षायणीहृदयपंकजतिग्मरश्मे
ये शीलयंति सततं भवतोंघ्रियुग्मं ते पुत्रपौत्रधनधान्यसमृद्धिभाजः
त्वं कारणं परमकारणकारणानां वेद्योसि वेदविदुषां सततं त्वमेकः 4.2.57.
वेदा विदंति न यथार्थतया भवंतं ब्रह्मादयोपि न चराचर सूत्रधार