क्षत्रियैश्च तथा वैश्यैः सत्यशौचपरायणैः
दुष्करं भीष्ममित्याहुर्न शक्यं प्राकृतैर्नरैः 2.4.32.
व्रतं चैतन्महापुण्यं महापातकनाशनम्
कार्तिकस्याऽमले पक्षे स्नात्वा सम्यग्विधानतः
प्रातः स्नात्वा विशेषेण मध्याह्ने च तथा व्रती
यवव्रीहितिलैः सम्यक्पितॄन्संतर्पयेत्क्रमात्
भीष्मायोदकदानं च अर्घ्यं चैव प्रयत्नतः
पंचरत्नं विशेषेण दत्त्वा विप्राय यत्नतः
पञ्चके पूजयित्वा तु कोटिजन्मानि तुष्यति
यत्किंचिद्ददते मर्त्यः पंचधातुप्रकल्पितम्
कृत्वा तूदकदानं तु तथाऽर्घ्यस्य च दापनम्
वैयाघ्रपादगोत्राय सांकृत्य प्रवराय च 2.4.32.
वसूनामवताराय शंतनोरात्मजाय च
अश्वमेधसमं पुण्यं प्राप्नोत्यत्र न संशयः
पंचाऽहमपि कर्तव्यं नियमं च प्रयत्नतः
उत्तरायणहीनाय भीष्माय प्रददौ हरिः
ततः संपूजयेद्देवं सर्वपापहरं हरिम्
स्नापयेत जलैर्भक्त्या मधुक्षीरघृतेन च
चन्दनेन सुगन्धेन कुमकुमेनाऽथ केशवम्
अर्चयेद्रुचिरैः पुष्पैर्गंधधूपसमन्वितैः
दीपकं तु दिवा रात्रौ दद्यात्पंच दिनानि तु
एवमभ्यर्चयेद्देवं संस्मृत्य च प्रणम्य च 2.4.32.
जुहुयाच्च घृताभ्यक्तैस्तिलव्रीहियवादिभिः
उपास्य पश्चिमां संध्यां प्रणम्य गरुडध्वजम्
सर्वमेतद्विधानं तु कार्यं पञ्च दिनानि तु
प्रथमेऽह्नि हरेः पादौ पूजयेत्कमलैर्व्रती
ततोऽनुपूजयेच्छीर्षं मालत्या चक्रपाणिनः
अर्चित्वा तं हृषीकेशमेकादश्यां समासतः
गोमूत्रं मन्त्रवद्भूमौ द्वादश्यां प्राशयेद्व्रती
संप्राश्य कायशुद्ध्यर्थं लंघयित्वा चतुर्दिनम् भोजयेद्ब्राह्मणान्भक्त्या तेभ्यो दद्याच्च दक्षिणाम्