अघमर्षणकं कृत्वा स्नानांगं तर्पणं तथा
ततस्तु बहिरागत्य तीर्थं शिरसि निक्षिपेत्
ततो जलाद्विनिष्क्रम्य चांचलं पीडयेद्बहिः
तद्दोषपरिहारार्थं यक्ष्मणं तर्पयाम्यहम्
अरुणं प्रति सूर्येण यदुक्तं च सविस्तरम्
क्षेत्रे वा एतदाऽऽख्याहि भगवन्स्नानयोगतः
यत्र कुत्राऽपि कर्तव्यं जले स्नानं तु कार्तिकं
ततो दशगुणं पुण्यं शीततोयनिमज्जनात् 2.4.4.
कूपात्सहस्रगुणितं फलं वापीनिषेकतः
ततो दशगुणं पुण्यं निर्झरेषु निमज्जनात्
नद्या दशगुणं प्रोक्तं तीर्थस्नानं खगोत्तम
नदीत्रयस्य संयोगे पुण्यस्यांऽतो न विद्यते
गोदावरी विपाशा च नर्मदा तमसा मही
वितस्ता वेदिका शोणो वेत्रवत्यपराजिता
वाग्मती च शतद्रुश्च तथा बदरिकाश्रमः
सर्वेभ्यश्च स्थलेभ्यश्च आर्यावर्तं तु पुण्यदम्
अनंतसेनवसतिर्वराहक्षेत्रमेव च
अवंतिका ततः श्रेष्ठा ततो बदरिकाश्रमः 2.4.4.
ततः कनखलं तीर्थं ततो मधुपुरी वरा
यैः स्नातस्ते तु वैकुंठे बहुकालं वसंति हि
अतो मधुपुरी श्रेष्ठा यमुना च विशेषतः
द्वारावती ततः श्रेष्ठा प्रत्यहं स्नाति केशवः
द्वारकायां मृत्तिकायास्तिलको येन मस्तके द्वारकास्नानमाहात्म्यं न वक्तुं शक्यते मया
गोविंदार्पितचित्तानां जायते पुण्यभास्करा
तस्माद्दशगुणं पुण्यं तीर्थराजेऽत्र जायते
कलौ दशसहस्रांऽते विष्णुस्त्यक्ष्यति मेदिनीम्
यावत्तिष्ठति गंगाऽत्र तावत्तीर्थानि संति च
यदैव गंगा नष्टा स्यात्को वा तत्पापमाहरेत् 2.4.4.
तस्मान्मुनीश्वराः सर्वे यावत्तिष्ठति जाह्नवी
समाधिं गृह्य सुदृढां यावत्कृतयुगं भवेत्