कृतं नाम तदा तस्य लिंगस्य कमलानने लुम्पेश्वर इति ख्यातो भविष्यति महीतले
पूजयिष्यंति ये भक्त्या लिंगं लुम्पेश्वरं परम्
प्रार्थयिष्यंति यान्कामान्मनसा। चेप्सितान्प्रियान्
महापापसमायुक्तो यः पश्यति समाहितः
गोघ्नश्चैव कृतघ्नश्च मातृहा गुरुतल्पगः
लुम्पेश्वरं सकृत्पश्यन्मुच्यते सर्वकिल्बिषैः
इत्युक्त्वा मुनयः सर्वे पूजयामासु रन्विताः 5.2.41.
एष ते कथितो देवि प्रभावः पापनाशनः
यस्य दर्शनमात्रेण सर्वतीर्थफलं लभेत्
पदात्प्रवृत्ता या देवी गंगा त्रिपथगा नदी
ततः संवर्द्धमानार्करश्मिसंगतिपावनी
मेरुकूटतटान्तेभ्यो निपतन्ती यशस्विनी
मन्दरादिषु शैलेषु प्रविभक्तोदका समम्
तत्प्लायित्वा च ययावरुणोदं सरिद्वरा
तथैवालकनन्दाख्या दक्षिणे गन्धमादने
मानसं च महावेगात्प्लावयित्वा सरोवरम्
तस्माच्च पर्वताः सर्वे प्लावितास्तत्क्षणात्प्रिये
मया धृता च तत्रैव जटाजूटेन पार्वति 5.2.42.
गात्राणि प्लावयामास मदीयानि वरानने
तत्रैव सा तपश्चक्रे बहुकल्पशतानि च
तदा मुक्ता मया देवि गंगा त्रिपथगामिनी
समुद्रमहिषी जाता प्राणेभ्योऽपि गरीयसी स तया सहितो रेमे समुद्रः सरितांपतिः
ततः कदाचिद्ब्रह्माणमुपासांचक्रिरे सुराः गंगया सहितो देवि दर्शनार्थं महोत्सवे
अथ गंगा सरिच्छ्रेष्ठा समुपायात्पितामहम्
ततोऽभवन्सुरगणाः सहसाऽवाङ्मुखास्तदा
तस्य भावं विदित्वाऽथ ब्रह्मणा स तिरस्कृतः
गंगा शप्ताथ क्रुद्धेन समुद्रेण यशस्विनि
लोकमल्पायुषं दीना तत्र दुःखमवाप्स्यसि 5.2.42.
विनापराधाच्छप्ताहं कस्माद्वै देवसंसदि
प्रमादाद्वस्त्रमुद्धूतं वायुना व्यापकेन तु