शिवपुराणम्

सर्वोपमानरहितं सानुगं सपरिच्छदम् ततः संचिंतयेत्तस्य वामभागे महेश्वरीम्

प्रफुल्लोत्पलपत्राभां विस्तीर्णायतलोचनाम् पूर्णचंद्राभवदनां नीलकुंचितमूर्धजाम्

नीलोत्पलदलप्रख्यां चन्द्रार्धकृतशेखराम् अतिवृत्तघनोत्तुंगस्निग्धपीनपयोधराम्

तनुमध्यां पृथुश्रोणीं पीतसूक्ष्मवराम्बराम् सर्वाभरणसंपन्नां ललाटतिलकोज्ज्वलाम्

विचित्रपुष्पसंकीर्णकेशपाशोपशोभिताम् सर्वतो ऽनुगुणाकारां किंचिल्लज्जानताननाम्

हेमारविंदं विलसद्दधानां दक्षिणे करे दंडवच्चापरं हस्ते न्यस्यासीनां महासने

पाशविच्छेदिकां साक्षात्सच्चिदानंदरूपिणीम् एवं देवं च देवीं च ध्यात्वासनवरे शुभे

सर्वोपचारवद्भक्त्या भावपुष्पैस्समर्चयेत् अथवा परिकल्प्यैवं मूर्तिमन्यतमां विभोः

शैवीं सदाशिवाख्यां वा तथा माहेश्वरीं पराम् षड्विंशकाभिधानां वा श्रीकंठाख्यामथापि वा

मन्त्रन्यासादिकां चापि कृत्वा स्वस्यां तनौ यथा अस्यां मूर्तौ मूर्तिमंतं शिवं सदसतः परम्

ध्यात्वा बाह्यक्रमेणैव पूजां निर्वर्तयेद्धिया समिदाज्यादिभिः पश्चान्नाभौ होमं च भावयेत्

भ्रूमध्ये च शिवं ध्यायेच्छुद्धदीपशिखाकृतिम् इत्थमंगे स्वतंत्रे वा योगे ध्यानमये शुभे

अग्निकार्यावसानं च सर्वत्रैव समो विधिः अथ चिंतामयं सर्वं समाप्याराधनक्रमम्

लिंगे च पूजयेद्देवं स्थंडिले वानले ऽपि वा

प्रोक्षयेन्मूलमंत्रेण पूजास्थानं विशुद्धये गन्धचन्दनतोयेन पुष्पं तत्र विनिक्षिपेत्

अस्त्रेणोत्सार्य वै विघ्नानवगुण्ठ्य च वर्मणा अस्त्रं दिक्षु प्रविन्यस्य कल्पयेदर्चनाभुवम्

तत्र दर्भान्परिस्तीर्य क्षालयेत्प्रोक्षणादिभिः संशोध्य सर्वपात्राणि द्रव्यशुद्धिं समाचरेत्

प्रोक्षणीमर्ध्यपात्रं च पाद्यपात्रमतः परम् तथैवाचमनीयस्य पात्रं चेति चतुष्टयम्

प्रक्षाल्य प्रोक्ष्य वीक्ष्याथ क्षिपेत्तेषु जलं शिवम् पुण्यद्रव्याणि सर्वाणि यथालाभं विनिक्षिपेत्

रत्नानि रजतं हेम गन्धपुष्पाक्षतादयः फलपल्लवदर्भांश्च पुण्यद्रव्याण्यनेकधा

स्नानोदके सुगन्धादि पानीये च विशेषतः शीतलानि मनोज्ञानी कुसुमादीनि निक्षिपेत्

उशीरं चन्दनं चैव पाद्ये तु परिकल्पयेत् जातिकंकोलकर्पूरबहुमूलतमालकान्

क्षिपेदाचमनीये च चूर्णयित्वा विशेषतः एलां पात्रेषु सर्वेषु कर्पूरं चन्दनं तथा

कुशाग्राण्यक्षतांश्चैव यवव्रीहितिलानपि आज्यसिद्धार्थपुष्पाणि भसितञ्चार्घ्यपात्रके

कुशपुष्पयवव्रीहिबहुमूलतमालकान् प्रक्षिपेत्प्रोक्षणीपात्रे भसितं च यथाक्रमम्

सर्वत्र मन्त्रं विन्यस्य वर्मणावेष्ट्य बाह्यतः पश्चादस्त्रेण संरक्ष्य धेनुमुद्रां प्रदर्शयेत्

पूजाद्रव्याणि सर्वाणि प्रोक्षणीपात्रवारिणा सम्प्रोक्ष्य मूलमंत्रेण शोधयेद्विधिवत्ततः

पात्राणां प्रोक्षणीमेकामलाभे सर्वकर्मसु साधयेदर्घ्यमद्भिस्तत्सामान्यं साधकोत्तमः

ततो विनायकं देवं भक्ष्यभोज्यादिभिः क्रमात् पूजयित्वा विधानेन द्वारपार्श्वे ऽथ दक्षिणे