विमुखा नार्थिनो यांति भवतो गृहमागताः। अर्थिनां कल्पवृक्षोसि दाता चान्यो न विद्यते
प्रभायां सूर्यतुल्योसि गांभीर्ये सागरोपमः। सहिष्णुत्वे धरा चैव श्रिया नारायणोपमः
ब्राह्मणः कश्यपकुले जातोयं वामनः शुभे। प्रार्थितोहमनेनैवं भूमेर्देहि पदत्रयं
ममाग्निशरणार्थाय यत्र कुर्यां मखं त्वहं। तदस्य कारणं कृत्वा अर्थितैषा मम प्रभो
लोकत्रयं मेऽपहृतं त्वया विक्रम्य बाष्कले। निर्वृत्तिको निर्धनोस्मि यद्दित्से न तदस्ति मे
भवंतं याचयिष्यामि परार्थेनापि चात्मना। अर्थित्त्वेन ममाप्यस्य यद्योग्यं तत्समाचर
जातोसि काश्यपे च त्वं वंशे वंशविवर्द्धनः। दित्यास्त्वं गर्भसंभूतः पिता त्रैलोकपूजितः
एवंभूतमहं ज्ञात्वा तेन त्वां याचयाम्यहम्। अस्याग्निशरणार्थाय दीयतां भू पदत्रयम्
अतीव ह्रस्वगात्रस्य वामनस्यास्य दानव। भूमिभागे च पारक्ये दातुं न त्वहमुत्सहे
एतदेव मया दत्तं यद्भवानर्थितोसि मे। गुरवो यदि मन्यंते मंत्रिणो वा पदत्रयम्
अर्थित्वेन मदीयेन स्वकुले बांधवेपि च। गृहायाते मयि तथा यद्योग्यं तत्समाचर
यदि ते रुचितं वीर दानवेंद्र महाद्युते। तदस्मै दीयतां शीघ्रं वामनाय महात्मने
बाष्कलिरुवाच। देवेंद्र स्वागतं तेऽस्तु स्वस्ति प्राप्नुहि मा चिरम्। त्वं समीक्षस्वधात्मानं सर्वेषां च परायणम्
त्वयि भारं समावेश्य सुखमास्ते पितामहः। ध्यानधारणयायुक्तश्चिंतयानः परं पदम्
संग्रामैर्बहुभिः खिन्नो जगच्चिंतामपास्य तु। क्षीराब्धिद्वीपमाश्रित्य सुखं स्वपिति केशवः
अन्ये च दानवाः सर्वे बलिनः सायुधास्त्वया। असहायेनैव शक्र सर्वेपि विनिपातिताः
आदित्या द्वादशैवेह रुद्रास्त्वेकादशापि वा। अश्विनौ वसवश्चैव धर्मश्चैव सनातनः
त्वद्बाहुबलमाश्रित्य त्रिदिवे मखभागिनः। त्वया क्रतुशतैरिष्टं समाप्तवरदक्षिणैः
त्वया च घातितो वृत्रो नमुचिः पाकशासन। त्वदाज्ञाकारिणा पूर्वं विष्णुना प्रभविष्णुना
हिरण्यकशिपोर्भ्राता हिरण्याक्षोपि घातितः। हिरण्यकशिपुर्योत्र जङ्घे चारोप्य घातितः
वज्रपाणिनमायांतमैरावणशिरोगतम्। संग्रामभूमौ दृष्ट्वा त्वां सर्वे नश्यंति दानवाः
ये त्वया विजिताः पूर्वं दानवा बलवत्तराः। सहस्रांशेन तत्तुल्यो न भवामि कथंचन
एवंविधोऽसि देवेंद्र मम का गणना भवेत्। मां समुद्धर्तुकामेन त्वयैवागमनं कृतम्
करिष्यामि न संदेहो दास्ये प्राणानपि ध्रुवम्। किमर्थं देवराजोक्ता भूमिरेषा त्वया हि मे
इमे दाराः सुता गावो यच्चान्यद्विद्यते वसु। त्रैलोक्यराज्यमखिलं विप्रस्यास्य प्रदीयताम्
अपकीर्तिर्भवेन्मह्यं पूर्वेषां च न संशयः। गृहायातस्य शक्रस्य दत्तं बाष्कलिना न तु
अन्योपि योर्थी मे प्राप्तः समे प्रियतरः सदा। भवानत्र विशेषेण विचारं मा कृथाः क्वचित्
बृहत्त्रपा मे देवेंद्र यद्भूमेस्तु पदत्रयम्। ब्राह्मणस्य विशेषेण प्रार्थितं तु त्वया विभो
दास्ये ग्रामवरानस्य भवतस्तु त्रिविष्टपम्। अश्वान्गजान्भूमिधनं स्त्रियश्चोद्भिन्नचूचुकाः
यासां दर्शनमात्रेण वृद्धोपि तरुणायते। ताः स्त्रियो वसुधां चैतां वामनस्य प्रतिग्रहम्