परिष्वज्याभिनन्द्यैनं गृहं प्रावेशयत्स्वकम्। तस्य स्वागतमर्घ्याद्यैः कृत्वा पूजां प्रयत्नतः
अद्य मे सफलं जन्म पूर्णाः सर्वे मनोरथाः। यस्त्वां पश्यामि शक्राद्य स्वयमेव गृहागतम्
ख्याप्योहं दनुमुख्यानां देवराज त्वया कृतः। आगच्छता मम गृहं पुण्यता तु परा हि मे
अग्निष्टोमादिभिर्यज्ञैस्सम्यगिष्टैस्तु यत्फलम्। तत्फलं समवाप्येत त्वयि दृष्टे पुरंदर
यत्फलं भूमिदानेन गवां दानेन ऋत्विजे। ममाद्य तत्फलं भूतमथवा राजसूयकम्
नाल्पेन तपसा लभ्यं दर्शनं तव वासव। एवं गेहे मया यत्ते प्रियं कार्यं तदुच्यताम्
विकल्पोऽन्यो न भवता हृदि कार्यः कथंचन। कृतं च तद्विजानीया यद्यदि स्यात्सुदुष्करं
पुण्योहं पुण्यतां प्राप्तो दर्शनात्तव शत्रुहन्। यत्ते देव वरैर्वंद्यौ वंदितौ चरणौ मया
किमागमनकृत्यं ते वद सर्वं मयि प्रभो। अत्याश्चर्यमिदं मन्ये तवागमन कारणं
इंद्र उवाच। जानेहं दनुमुख्यानां प्रधानं त्वां तु बाष्कले। नात्याश्चर्यमिदं भाति त्वयि दृष्टेऽसुरोत्तम
विमुखा नार्थिनो यांति भवतो गृहमागताः। अर्थिनां कल्पवृक्षोसि दाता चान्यो न विद्यते
प्रभायां सूर्यतुल्योसि गांभीर्ये सागरोपमः। सहिष्णुत्वे धरा चैव श्रिया नारायणोपमः
ब्राह्मणः कश्यपकुले जातोयं वामनः शुभे। प्रार्थितोहमनेनैवं भूमेर्देहि पदत्रयं
ममाग्निशरणार्थाय यत्र कुर्यां मखं त्वहं। तदस्य कारणं कृत्वा अर्थितैषा मम प्रभो
लोकत्रयं मेऽपहृतं त्वया विक्रम्य बाष्कले। निर्वृत्तिको निर्धनोस्मि यद्दित्से न तदस्ति मे
भवंतं याचयिष्यामि परार्थेनापि चात्मना। अर्थित्त्वेन ममाप्यस्य यद्योग्यं तत्समाचर
जातोसि काश्यपे च त्वं वंशे वंशविवर्द्धनः। दित्यास्त्वं गर्भसंभूतः पिता त्रैलोकपूजितः
एवंभूतमहं ज्ञात्वा तेन त्वां याचयाम्यहम्। अस्याग्निशरणार्थाय दीयतां भू पदत्रयम्
अतीव ह्रस्वगात्रस्य वामनस्यास्य दानव। भूमिभागे च पारक्ये दातुं न त्वहमुत्सहे
एतदेव मया दत्तं यद्भवानर्थितोसि मे। गुरवो यदि मन्यंते मंत्रिणो वा पदत्रयम्
अर्थित्वेन मदीयेन स्वकुले बांधवेपि च। गृहायाते मयि तथा यद्योग्यं तत्समाचर
यदि ते रुचितं वीर दानवेंद्र महाद्युते। तदस्मै दीयतां शीघ्रं वामनाय महात्मने
बाष्कलिरुवाच। देवेंद्र स्वागतं तेऽस्तु स्वस्ति प्राप्नुहि मा चिरम्। त्वं समीक्षस्वधात्मानं सर्वेषां च परायणम्
त्वयि भारं समावेश्य सुखमास्ते पितामहः। ध्यानधारणयायुक्तश्चिंतयानः परं पदम्
संग्रामैर्बहुभिः खिन्नो जगच्चिंतामपास्य तु। क्षीराब्धिद्वीपमाश्रित्य सुखं स्वपिति केशवः
अन्ये च दानवाः सर्वे बलिनः सायुधास्त्वया। असहायेनैव शक्र सर्वेपि विनिपातिताः
आदित्या द्वादशैवेह रुद्रास्त्वेकादशापि वा। अश्विनौ वसवश्चैव धर्मश्चैव सनातनः
त्वद्बाहुबलमाश्रित्य त्रिदिवे मखभागिनः। त्वया क्रतुशतैरिष्टं समाप्तवरदक्षिणैः
त्वया च घातितो वृत्रो नमुचिः पाकशासन। त्वदाज्ञाकारिणा पूर्वं विष्णुना प्रभविष्णुना
हिरण्यकशिपोर्भ्राता हिरण्याक्षोपि घातितः। हिरण्यकशिपुर्योत्र जङ्घे चारोप्य घातितः