त्रिदशानां वचः श्रुत्वा मैत्रावरुणिरब्रवीत्। किमर्थं समुपायाता वरं मत्तः किमिच्छथ
एवमुक्तास्तदा तेन देवास्तं मुनिमब्रुवन्। इच्छाम एकं वरमद्भुतं वयं पिबार्णवं देवमुने महात्मन्
एवं त्वयेच्छेम कृते महर्षे महार्णवं पीयमानं समग्रम्। ततो विहन्याम च सानुबंधं कालेयसंज्ञं सुरविद्विषां बलम्
त्रिदशानां वचः श्रुत्वा तथेति मुनिरब्रवीत्। करिष्ये भवतां कामं लोकानां सुखकारकम्
एवमुक्त्वा ततोऽगच्छत्समुद्रं निधिमंभसाम्। तपःसिद्धैश्च मुनिभिः सार्धं देवैश्च सुव्रत
मनुष्योरगगंधर्वा यक्षाः किंपुरुषास्तथा। अनुजग्मुर्महात्मानं द्रष्टुकामास्तदद्भुतम्
ततोऽभ्यपश्यत्सहितः समुद्रं भीमनिःस्वनम्। नृत्यंतमिव चोर्मीभिर्वल्गंतमिव वायुना
हसंतमिव फेनौघैः स्खलंतं कंदरेषु च। नानाग्राहसमाकीर्णं नानाद्विजगणैर्युतम्
अगस्त्यसहिता देवाः सगंधर्वमहोरगाः। ऋषयश्च महाभागाः समासेदुर्महोदधिम्
समुद्रं स समासाद्य वारुणिर्भगवानृषिः। उवाच सहितान्देवानृषींस्तांस्तु समागतान्
पातुकामः समुद्रं च अगस्त्य ऋषिसत्तमः। एष लोकहितार्थाय पिबामि वरुणालयम्
भवतां यदनुष्ठेयं तच्छीघ्रं संविधीयताम्। एतावदुक्त्वा वचनं मैत्रावरुणिरग्रतः
समुद्रमपिबत्क्रुद्धस्सर्वलोकस्य पश्यतः। पीयमानं समुद्रं तु दृष्ट्वा देवाः सवासवाः
विस्मयं परमं जग्मुस्स्तुतिभिश्चाप्यपूजयन्। त्वं नस्त्राता विधाता च लोकानां लोकभावनः। त्वत्प्रसादात्समुत्सेधमुपगच्छेत्समं जगत्
संपूज्यमानस्त्रिदशैर्महात्मा गंधर्वमुख्येषु नदत्सु चैव। दिव्यैश्च पुष्पैरवकीर्यमाणो महार्णवं निःसलिलं चकार
दृष्ट्वा कृतं निःसलिलं महार्णवं सुराः समस्ताः परमप्रहृष्टाः। प्रगृह्य दिव्यानि वरायुधानि तान्दानवान्जघ्नुरदीनसत्त्वाः
ते वध्यमानास्त्रिदशैर्महात्मभिर्महाबलैर्वेगयुतैर्नदद्भिः। न सेहिरे वेगवतां महात्मनां वेगं तदा धारयितुं दिवौकसाम्
ते वध्यमानास्त्रिदशैर्दानवा भीमनिःस्वनाः। चक्रुः सुतुमुलं युद्धं मुहूर्त्तमिव भारत
ते पूर्वं तपसा दग्धा मुनिभिर्भावितात्मभिः। यतमानाः परं शक्त्या त्रिदशैर्विनिषूदिताः
ते हेमनिष्काभरणाः कुंडलांगदधारिणः। निहता बह्वशोभंत पुष्पिता इव किंशुकाः
हतशिष्टास्ततः केचित्कालेयदनुजोत्तमाः। विदार्य वसुधां देवीं पातालतलमाश्रिताः
निहतान्दानवान्दृष्ट्वा त्रिदशा मुनिपुंगवम्। तुष्टुवुर्विविधैर्वाक्यैरिदं चैवाब्रुवन्वचः
त्वत्प्रसादान्महाभाग लोकैः प्राप्तं महत्सुखम्। त्वत्तेजसा च निहताः कालेया भीमविक्रमाः
पूरयस्व महाविप्र समुद्रं लोकभावनम्। यत्त्वया सलिलं पीतं तदस्मिन्पुनरुत्सृज
एवमुक्तः प्रत्युवाच भगवान्मुनिपुंगवः। जीर्णं तद्धि मया तोयमुपायोन्यः प्रचिंत्यताम्
पूरणार्थं समुद्रस्य भवद्भिर्यत्नमास्थितैः। एवं श्रुत्वा तु वचनं महर्षेर्भावितात्मनः
विस्मिताश्च विषण्णाश्च बभूवुः सहितास्सुराः। परस्परमनुज्ञाप्य प्रणम्य मुनिपुंगवम्
प्रजाः सर्वा महाराज विप्रा जग्मुर्यथागतम्। त्रिदशा विष्णुना सार्द्धमनुजग्मुः पितामहम्
पूरणार्थं समुद्रस्य मंत्रयंतः परस्परम्। ऊचुः प्रांजलयः सर्वे सागरस्य हि पूरणम्
तानुवाच समेतांस्तु ब्रह्मा लोकपितामहः। गच्छध्वं विबुधास्सर्वे यथाकामं यथेप्सितम्