पुष्करे दुष्करं दानं वासश्चैव सुदुष्करः। ब्राह्मणो वेदविद्वांस्तु गत्वा वै ज्येष्ठपुष्करं
स्नानाद्भवेन्मोक्षभागी श्राद्धेन पितृतारकः। नाममात्रोपि यो विप्रो गत्वा संध्यामुपासते
वर्षाणि द्वादशैवेह तेन संध्या ह्युपासिता। भवेत्तु नात्र संदेहः पुरा प्रोक्तं स्वयंभुवा
सावित्री कथितो दोषः कुले तस्य न जायते। या पत्नी ददते भर्तुः संध्योपास्तिं करिष्यतः
करकेण तु ताम्रेण तोयं मुक्ता दिवं व्रजेत्। ब्रह्मलोकमनुप्राप्य तिष्ठति ब्रह्मणो दिनं५० 1.19.
एकाकिना गतेनापि संध्या वंद्या यथाक्रमं। पौष्करेणाथ तोयेन भृंगारे निहितेन तु
दक्षिणां दिशमास्थाय गायत्र्या राजसत्तम। पितॄणां परमा तृप्तिः क्रियते द्वादशाब्दिकी
युगसहस्रं पिण्डेन श्राद्धेनानन्त्यमश्नुते। एतदर्थं हि विद्वांसः कुर्वंते दारसंग्रहं
तीर्थे गत्त्वा प्रदास्यामः पिंडान्वै श्राद्धपूर्वकं। तेषां पुत्रा धनं धान्यमविच्छिन्ना च संततिः
भवेद्वै नात्र संदेह एतदाह पितामहः। तर्पयित्वा पितॄन्देवानग्निष्टोमफलं लभेत्
आश्रमानपि ते वच्मि शृणुष्वैकमना नृप। अगस्त्येन कृतश्चात्र आश्रमो देवसंमितः
सप्तर्षीणां पुरा चात्र आश्रमो देवसम्मतः। ब्रह्मर्षीणां तथा चात्र मनूनां परमस्तथा
नागानां च पुरी रम्या यज्ञपर्वतरोधसि। अगस्त्यस्य महाराज प्रभावममितात्मनः
कथयामि समासेन शृणु त्वं सुसमाहितः। पूर्वं कृतयुगे भीष्म दानवा युद्धदुर्मदाः
कालेया इति विख्याता गणाः परमदारुणाः। ते तु वृत्रं समाश्रित्य देवान्हंतुं समुद्यताः
ततो देवाः समुद्विग्ना ब्रह्माणमुपतस्थिरे। कृतांजलींस्तु तान्सर्वान्परमेष्ठीत्युवाच ह
विदितं मे सुराः सर्वं यद्वः कार्यं चिकीर्षितं। तमुपायं प्रवक्ष्यामि यथा वृत्रं वधिष्यथ
दधीचिरिति विख्यातो महानृषिरुदारधीः। तं गत्वा सहितास्सर्वे वरं च प्रतियाचत
स वो दास्यति धर्मात्मा सुप्रीतेनांतरात्मना। स वाच्यः सहितैः सर्वैर्भवद्भिर्जयकांक्षिभिः
स्वान्यस्थीनि प्रयच्छस्व त्रैलोक्यहितकांक्षया। स शरीरं समुत्सृज्य स्वान्यस्थीनि प्रदास्यति
तस्यास्थिभिर्महाघोरं वज्रं संक्रियतां दृढं। महच्छत्रुहनं दिव्यं तदस्त्रमशनिः स्मृतं
तेन वज्रेण वै वृत्रं वधिष्यति शतक्रतुः। एतद्वः सर्वमाख्यातं तस्मात्सर्वं विधीयतां
एवमुक्तास्ततो देवा अनुज्ञाप्य पितामहं। शतक्रतुं पुरस्कृत्य दधीचेराश्रमं ययुः
सरस्वत्याः परे पारे नानाद्रुमलतावृतं। षट्पदोद्गीतनिनदैरुद्घुष्टं सामगैरिव
पुंस्कोकिलरवोन्मिश्रं जीवं जीवकनादितम्। महिषैश्च वराहैश्च सृमरैश्चमरैरपि
तत्रतत्रानुचरितैः शार्दूलभयवर्जितैः। करेणुभिर्वारणैश्च प्रभिन्नकरटामुखैः
स्वरोद्गारैश्च क्रीडद्भिः समंतादनुनादितं। सिंहव्याघ्रैर्महानादं नदद्भिरनुनादितं
मयूरैश्चापि संलीनैर्गुहाकंदरवासिभिः। तेषु तेषु च कुंजेषु नादितं सुमनोरमं
त्रिविष्टपसमप्रख्यं दधीच्याश्रममागमन्। तत्रापश्यन्दधीचिं तं दिवाकरसमप्रभम्
जाज्वल्यमानं वपुषा यथा लक्ष्म्या चतुर्भुजम्। तस्य पादौ सुरा राजन्नभिवंद्य प्रणम्य च। अयाचंत वरं सर्वे यथोक्तं परमेष्ठिना