पुष्करारण्यमासाद्य ब्रह्मचर्याश्रमे स्थितः। अभ्यासेन तु वेदानां वसति म्रियतेपि वा
मृतोऽसौ याति दिव्येन विमानेन स्वतेजसा। पूर्णचंद्रप्रकाशेन शशिवत्प्रियदर्शनः
रुद्रलोकं समासाद्य गुह्यकैः सह मोदते। ऐश्वर्यं महदाप्नोति सर्वस्य जगतः प्रभुः
भुक्त्वा युगसहस्राणि रुद्रलोके महीयते। प्रच्युतस्तु पुनस्तस्माद्रुद्रलोकात्क्रमेण तु
नित्यं प्रमुदितस्तत्र भुक्त्वा सुखमनामयम्। द्विजानां सदने दिव्ये कुले महति जायते
मानुषेषु स धर्म्मात्मा सुरूपो वाक्पतिर्भवेत्। स्पृहणीयवपुः स्त्रीणाम्महाभोगपतिर्बली
वानप्रस्थसमाचारी ग्राम्यौषधिविवर्जितः। सर्वलोकेषु चाप्यस्य गतिर्न प्रतिहन्यते
शीर्णपर्णफलाहारः पुष्पमूलांबुभोजनः। कापोतेनाश्मकुट्टेन दंतोलूखलिकेन च
वृत्युपायेन जीवेत चीरवल्कलवाससा। जटीत्रिषवणस्नायी त्यक्तदोषस्तु दंडवान्
कृच्छ्रव्रतपरो यस्तु श्वपचो यदि वा परः। जलशायी पंचतपा वर्षास्वभ्रावगाहकः
कीटकंटकपाषाणभूम्यां तु शयनं तथा। स्थानवीरासनरतः संविभागी दृढव्रतः
अरण्यौषधिभोक्ता च सर्वभूताभयप्रदः। नित्यं धर्मार्जनरतो जितक्रोधो जितेंद्रियः
ब्रह्मभक्तः क्षेत्रवासी पुष्करे वसते मुनिः। सर्वसंगपरित्यागी स्वारामो विगतस्पृहः
यश्चात्र वसते भीष्म शृणु तस्यापि या गतिः। तरुणार्कप्रकाशेन वेदिकास्तंभशोभिना
ब्रह्मभक्तो विमानेन याति कामप्रचारिणाम्। विराजमानो नभसि द्वितीय इव चंद्रमाः
गीतवादित्रनृत्यज्ञैर्गंधर्वाप्सरसांगणैः। अप्सरोभिः समायुक्तो वर्षकोटिशतान्यसौ
यस्य कस्यापि देवस्य लोकं यात्यनिवारितः। ब्रह्मणोऽनुग्रहेणैव तत्रतत्र विराजते
ब्रह्मलोकाच्च्युतश्चापि विष्णुलोकं स गच्छति। विष्णुलोकात्परिभ्रष्टो रुद्रलोकं स गच्छति
तस्मादपि च्युतः स्थानाद्द्वीपेषु स हि जायते। स्वर्गेषु च तथान्येषु भोगान्भुक्त्वा यथेप्सितान्
भुक्त्वैश्वर्यं ततस्तेषु पुनर्मर्त्येषु जायते। राजा वा राजपुत्रो वा जायते धनवान्सुखी
सुरूपः सुभगः कांतः कीर्तिमान्भक्तिभावितः। ब्राह्मणाः क्षत्रिया वैश्याः शूद्रा वा क्षेत्रवासिनः
स्वधर्मनिरता राजन्सुवृत्ताश्चिरजीविनः। सर्वात्मना ब्रह्मभक्ता भूतानुग्रहकारिणः
पुष्करे तु महाक्षेत्रे ये वसंति मुमुक्षवः। मृतास्ते ब्रह्मभवनं विमानैर्यांति शोभनैः
अप्सरोगणसंघुष्टैः कामगैः कामरूपिभिः। अथवा सर्वदीप्ताग्नौ स्वशरीरं जुहोति यः
ब्रह्मध्यायी महासत्वस्स ब्रह्मभवनं व्रजेत्। ब्रह्मलोकोऽक्षयस्तस्य शाश्वतो विभवैः सह
सर्वलोकोत्तमो रम्यो भवतीष्टार्थसाधकः। पुष्करे तु महापुण्ये प्राणान्ये सलिले त्यजन्
तेषामप्यक्षयो भीष्म ब्रह्मलोको महात्मनाम्। साक्षात्पश्यंति ते देवं सर्वदुःखविनाशनम्
सर्वामरयुतं देवं रुद्रविष्णुगणैर्युतम्। अनाशके मृताश्शूद्राः पुष्करे तु वने नराः
हंसयुक्तैस्ततो यांति विमानैरर्कसप्रभैः। नानारत्नसुवर्णाढ्यैर्दृढैर्गंधाधिवासितैः
अनौपम्यगुणैरन्यैरप्सरोगीतनादितैः। पताकाध्वजविन्यस्तैर्नानाघण्टानिनादितैः