ग्रहीतारस्तु जायन्ते सर्वे नरकगामिनः। ग्रथितां वसुजालेन शय्यां दांपत्यसेविताम्
ये स्पृशंति न जानंतः सर्वे नरकगामिनः। नवश्राद्धेन भोक्तव्यं भुक्त्वा चांद्रायणं चरेत्
पितृभक्त्या तु पुत्राणां कार्यमेव सदा भवेत्। वृषोत्सर्गं च कुर्वीत देया च कपिला शुभा
उदकुंभश्च दातव्यो भक्ष्यभोज्यफलान्वितः। यावदब्दं नरश्रेष्ठ सतिलोदकपूर्वकम्
ततः संवत्सरे पूर्णे सपिंडीकरणं भवेत्। सपिंडीकरणादूर्द्ध्वं प्रेतः पार्वणभुग्यतः
वृद्धिपूर्वेषु कार्येषु गृहस्थस्य भवेत्ततः। सपिंडीकरणं श्राद्धं देवपूर्वं नियोजयेत्
पितॄनावाहयेत्तत्र पृथक्प्रेतं विनिर्दिशेत्। गंधोदकतिलैर्युक्तं कुर्यात्पात्रचतुष्टयम्
अर्घ्यार्थं पितृपात्रेषु प्रेतपात्रं प्रसेचयेत्। तद्वत्संकल्प्य चतुरः पिंडान्पितृपरस्तदा
ये समाना इति द्वाभ्यामन्नं तु विभजेत्त्रिधा। अनेन विधिना चार्घ्यं पूर्वमेव प्रदापयेत्
ततः पितृत्वमापन्नस्स चतुर्थस्तदा त्वनु। अग्निष्वात्तादि मध्ये तु प्राप्नोत्यमृतमुत्तमम्
सपिण्डीकरणादूर्ध्वं पृथक्तस्मै न दीयते। पितृष्वेव च दातव्यं तत्पिंडं येषु संस्थितम्
ततः प्रभृति संक्रान्तावुपरागादि पर्वसु। त्रिपिंडमाचरेच्छ्राद्धमेकोद्दिष्टं मृतेहनि
एकोद्दिष्टं परित्यज्य मृताहे यः समाचरेत्। स दैवं पितृहा स स्यात्तथा भ्रातृविनाशकः
मृताहे पार्वणं कुर्वन्नधो याति स मानवः। संपृक्ते स्वर्गती भावे प्रेतमोक्षो यतो भवेत्
आमश्राद्धं तदा कुर्याद्विधिज्ञः श्राद्धदस्ततः। तेनाग्नौकरणं कुर्यात्पिंडांस्तेनैव निर्वपेत्
त्रिभिः सपिंडीकरणं मासैक्ये त्रितये तथा। यदा प्राप्स्यति कालेन तदा मुच्येत बंधनात्
मुक्तोपि लेपभागित्वं प्राप्नोति कुशमार्जनात्। लेपभाजश्चतुर्थाद्यास्त्रयः स्युः पिंडभागिनः
पिण्डदः सप्तमस्तेषां सपिंडाः सप्तपूरुषाः। भीष्म उवाच। कथं हव्यानि देयानि कव्यानि च जनैरिह
गृह्णंति पितृलोके वा प्रायः के कैर्निगद्यते। यदि मर्त्ये द्विजो भुंक्ते हूयते यदि वानले
शुभाशुभात्मकाः प्रेतास्तदन्नं भुंजते कथम्। पुलस्त्य उवाच। वसुस्वरूपाः पितरो रुद्राश्चैव पितामहाः
प्रपितामहास्तथादित्या इत्येषा वैदिकी श्रुतिः। नामगोत्रं पितॄणां तु प्रापकं हव्यकव्ययोः
श्राद्धस्य मन्त्रतस्तत्वमुपलभ्येत भक्तितः। अग्निष्वात्तादयस्तेषामाधिपत्ये व्यवस्थिताः
नामगोत्रास्तदा देशा भवंत्युद्भवतामपि। प्राणिनः प्रीणयत्येतदर्हणं समुपागतं
दिव्यो यदि पिता माता गुरुः कर्मानुयोगतः। तस्यान्नममृतं भूत्वा दिव्यत्त्वेप्यनुगच्छति
दैत्यत्वे भोगरूपेण पशुत्वेपि तृणं भवेत्। श्राद्धान्नं वायुरूपेण नागत्वेप्युपतिष्ठति
पानं भवति यक्षत्वे राक्षसत्वे तथामिषं। दानवत्वे तथा पानं प्रेतत्वे रुधिरोदकम्
मनुष्यत्वेन्नपानादि नानाभोगवतां भवेत्। रतिशक्तिस्त्रियः कान्तेऽन्येषां भोजनशक्तिता
दानशक्तिः स विभवा रूपमारोग्यमेव च। श्राद्धपुष्पमिदं प्रोक्तं फलं ब्रह्मसमागमः
आयुः पुत्रान्धनं विद्यां स्वर्गं मोक्षं सुखानि च। प्रयच्छन्ति तथा राज्यं प्रीताः पितृगणा नृप
श्रूयते च पुरा मोक्षं प्राप्ताः कौशिकसूनवः। पंचभिर्जन्मसंबंधैः प्राप्ता ब्रह्मपरं पदम्