करोत्येवंविधां सृष्टिं कल्पादौ स पुनःपुनः। सिसृक्षुश्शक्तियुक्तोसौ सृज्य शक्तिप्रचोदितः
भीष्म उवाच। अर्वाक्स्रोतास्तु कथितो भवता यस्तु मानुषः। ब्रह्मन्विस्तरतो ब्रूहि ब्रह्मा तमसृजद्यथा
यथा सवर्णानसृजद्गुणांश्च स महामुने। यच्च तेषां स्मृतं कर्म विप्रादीनां तदुच्यताम्
पुलस्त्य उवाच। सत्वाभिध्यायिनः पूर्वं सिसृक्षोर्ब्रह्मणः प्रजाः। अजायंत कुरुश्रेष्ठ सत्वोद्रिक्ता मुखात्प्रजाः
वक्षसो रजसोद्रिक्तास्तथान्या ब्रह्मणोभवन्। रजसस्तमसश्चैव समुद्रिक्तास्तथोरुतः
पद्भ्यामन्याः प्रजा ब्रह्मा ससर्ज कुरुसत्तम। तमःप्रधानास्ताः सर्वाश्चातुर्वर्ण्यमिदं ततः
ब्राह्मणाः क्षत्रिया वैश्याः शूद्राश्च नृपसत्तम। पादोरुवक्षस्थलतो मुखतश्च समुद्गताः
यज्ञनिष्पत्तये सर्वमेतद्ब्रह्मा चकार ह। चातुर्वर्ण्यं महाराज यज्ञसाधनमुत्तमम्
यज्ञेनाप्यायिता देवा वृष्ट्युत्सर्गेण मानवाः। आप्यायंते धर्मयज्ञा यतः कल्याणहेतवः
निष्पद्यंते नरैस्ते तु सुकर्मनिरतैः सदा। विरुद्धाचरणापेतैः सद्भिः सन्मार्गगामिभिः
स्वर्गापवर्गं मानुष्यात्प्राप्नुवंति नरा नृप। यच्चाभिरुचितं स्थानं तद्यांति मनुजा विभो
प्रजास्ता ब्रह्मणा सृष्टाश्चातुर्वर्ण्यव्यवस्थितौ। सम्यक्शुद्धाः समाचारा चरणा नृपसत्तम
यथेच्छावासनिरताः सर्वबाधाविवर्जिताः। शुद्धांतःकरणाः शुद्धा धर्मानुष्ठाननिर्मलाः
शुद्धे च तासां मनसि शुद्धांतःसंस्थिते हरौ। शुद्धज्ञानं प्रपश्यंति ब्रह्माख्यं येन तत्पदं
ततः कालात्मको योसौ विरिंचा वा स उच्यते। संसारपातमत्यर्थं घोरमल्पाल्पसारवत्
अधर्मबीजभूतं तत्तमोलोभसमुद्गतम्। प्रजासु तासु राजेंद्र रागादिक्रमसाधनम्
ततः सा सहजासिद्धिस्तेषां नातीव जायते। राजन्वश्यादयश्चान्याः सिद्धयोष्टौ भवंति याः
तासु क्षीणास्वशेषासु वर्द्धमाने च पातके। द्वंद्वाभिभवदुःखार्तास्ता भवंति ततः प्रजाः
ततो दुर्गाणि ताश्चक्रुर्वार्क्षं पार्वतमौदकम्। धान्वनं च तथा दुर्गं पुरं खार्वटकादि यत्
गृहाणि च यथान्यायं तेषु चक्रुः पुरादिषु। शीततापादिबाधानां प्रशमाय महामते
प्रतिहारमिमं कृत्वा शीतादेस्ताः प्रजाः पुनः। वार्तोपायं ततश्चक्रुर्हस्तसिद्धिं च कर्मजाम्
व्रीहयश्च यवाश्चैव गोधूमा अणवस्तिलाः। प्रियंगुकोविदाराश्च कोरदूषाः सचीनकाः
माषा मुद्गा मसूराश्च निष्पावाः सकुलत्थकाः। अढकाश्चणकाश्चैव शणास्सप्तदश स्मृताः
इत्येता ओषधीनां तु ग्राम्याणां जातयो नृप। ओषध्यो यज्ञियाश्चैव ग्राम्यावन्याश्चतुर्दश
व्रीहयः सयवा माषा गोधूमा अणवस्तिलाः। प्रियंगुसप्तमा ह्येता अष्टमास्तु कुलुत्थकाः
श्यामाकस्त्वथ नीवारो वर्तुलस्स गवेधुकः। अथ वेणुयवाः प्रोक्तास्तद्वन्मर्कटका नृप
ग्राम्या वन्याः स्मृता ह्येता ओषध्यश्च चतुर्दश। यज्ञनिष्पत्तये तद्वत्तथासां हेतुरुत्तमः १५० 1.3.
एताश्च सहयज्ञेन प्रजानां कारणं परम्। परापरविदः प्राज्ञास्ततो यज्ञान्वितन्वते
अहन्यहन्यनुष्ठानं यज्ञानां पार्थिवोत्तम। उपकारकरं पुंसां क्रियमाणं फलार्थिनाम्
येषां चकालसृष्टोसौ पपा(?)बिंदुर्महामते। मर्यादां स्थापयामास यथास्थानं यथागुणम्