ईजिरे दीर्घसत्रेण ऋषयो नैमिषे तदा। तत्र गत्वा तु तान्ब्रूहि पृच्छतो धर्मसंशयान्
उग्रश्रवास्ततो गत्वा ज्ञानविन्मुनिपुंगवान्। अभिगम्योपसंगृह्य नमस्कृत्वा कृतांजलिः
तोषयामास मेधावी प्रणिपातेन तानृषीन्। ते चापि सत्रिणः प्रीताः ससदस्या महात्मने
तस्मै समेत्य पूजां च यथावत्प्रतिपेदिरे। ऋषय ऊचुः। कुतस्त्वमागतः सूत कस्माद्देशादिहागतः
कारणं चागमे ब्रूहि वृंदारकसमद्युते। सूत उवाच। पित्राहं तु समादिष्टो व्यासशिष्येण धीमता
शुश्रूषस्व मुनीन्गत्वा यत्ते पृच्छंति तद्वद। वदंतु भगवंतो मां कथयामि कथां तु यां
पुराणं चेतिहासं वा धर्मानथ पृथग्विधान्। तां गिरं मधुरां तस्य शुश्रुवुर्ऋषिसत्तमाः
अथ तेषां पुराणस्य शुश्रूषा समपद्यत। दृष्ट्वा तमतिविश्वस्तं विद्वांसं लौमहर्षणिं
तस्मिन्सत्रे कुलपतिस्सर्वशास्त्राविशारदः। शौनको नाम मेधावी विज्ञानारण्यके गुरुः
इत्थं तद्भावमालंब्य धर्माञ्छुश्रूषुराह तम्। त्वया सूत महाबुद्धे भगवान्ब्रह्मवित्तमः
इतिहासपुराणार्थं व्यासः सम्यगुपासितः। दुदोहिथमतिं तस्य त्वं पुराणाश्रयां शुभां
अमीषां विप्रमुख्यानां पुराणं प्रति सम्प्रति। शुश्रूषाऽस्ते महाबुद्धे तछ्रावयितुमर्हसि
सर्वे हीमे महात्मानो नानागोत्राः समागताः। स्वान्स्वानंशान्पुराणोक्ताञ्छृण्वन्तु ब्रह्मवादिनः
संपूर्णे दीर्घसत्रेस्मिंस्तांस्त्वं श्रावय वै मुनीन्। पाद्मं पुराणं सर्वेषां कथयस्व महामते
कथं पद्मं समुद्भूतं ब्रह्म तत्र कथं न्वभूत्। प्रोद्भूतेन कथं सृष्टिः कृता तां तु तथा वद
एवं पृष्टस्ततस्तांस्तु प्रत्युवाच शुभां गिरम्। सूक्ष्मं च न्यायसंयुक्तं प्राब्रवीद्रौमहर्षणिः
प्रीतोस्म्यनुगृहीतोस्मि भवद्भिरिह चोदनात्। पुराणार्थं पुराणज्ञैः सर्वधर्मपरायणैः
यथाश्रुतं सुविख्यातं तत्सर्वं कथयामि वः। धर्म एष तु सूतस्य सद्भिर्दृष्टः सनातनः
देवतानामृषीणां च राज्ञां चामिततेजसाम्। वंशानां धारणं कार्यं स्तुतीनां च महात्मनाम्
इतिहासपुराणेषु दृष्टा ये ब्रह्मवादिनः। न हि वेदेष्वधीकारः कश्चित्सूतस्य दृश्यते
वैन्यस्य हि पृथोर्यज्ञे वर्त्तमाने महात्मनः। मागधश्चैव सूतश्च तमस्तौतां नरेश्वरम्
तुष्टेनाथ तयोर्द्दत्तो वरो राज्ञा महात्मना। सूताय सूतविषयो मगधो मागधाय च
तत्र सूत्यां समुत्पन्नः सूतो नामेह जायते। ऐन्द्रे सत्रे प्रवृत्ते तु ग्रहयुक्ते बृहस्पतौ
तमेवेंद्रं बार्हस्पत्ये तत्र सूतो व्यजायत। शिष्यहस्तेन यत्पृक्तमभिभूतं गुरोर्हविः
अधरोत्तरधारेण जज्ञे तद्वर्णसंकरम्। येत्र क्षत्रात्समभवन्ब्राह्मण्याश्चैव योनितः
पूर्वेणैव तु साधर्म्याद्वैधर्मास्ते प्रकीर्तिताः। मध्यमो ह्येष सूतस्य धर्मः क्षेत्रोपजीविनः
पुराणेष्वधिकारो मे विहितो ब्राह्मणैरिह। दृष्ट्वा धर्ममहं पृष्टो भवद्भिर्ब्रह्मवादिभिः
तस्मात्सम्यग्भुवि ब्रूयां पुराणमृषिपूजितम्। पितॄणां मानसी कन्या वासवं समपद्यत
अपध्याता च पितृभिर्मत्स्यगर्भे बभूव सा। अरणीव हुताशस्य निमित्तं पुण्यजन्मनः
तस्यां बभूव पूतात्मा महर्षिस्तु पराशरात्। तस्मै भगवते कृत्वा नमः सत्याय वेधसे